«Дарё» сайтида ҳафтанинг энг муҳим ва муҳокамали хабарлари шарҳини келтирамиз.
Дунёнинг энг шинам метрополитенларидан бири бўлган Тошкент метрополитени янада қулайлаштирилди. Метрода юришдан мақсад вақтни иқтисод қилишдир. Аммо навбатда туриб жетон олиш ва турникетга солиш бу тежалган вақтни баъзан йўққа чиқараёзади. Ўтган ҳафта Тошкент метрополитенининг 21 та станциясида контактсиз тўлов, яъни Humo пластик картаси орқали йўлкира тўлаш дастури ниҳоясига етказилди. Ҳозир метрополитеннинг «Буюк ипак йўли», «Амир Темур хиёбони», «Мустақиллик майдони», «Пахтакор», «Мирзо Улуғбек», «Чилонзор», «Беруний», «Минор», «Абдулла Қодирий» бекатларида карта ёрдамида тўлаш тизими яратилган.
Эслатиб ўтамиз, Тошкент метроси 1977 йилда очилган бўлиб, ҳозир бир кунда 200 минг нафаргача йўловчини ташийди.
* * *
Ҳафта қайғули воқеалари Самарқанд ва Андижонда фуқароларнинг овқатдан заҳарланишидир. 7 октябрь куни Самарқанд вилояти юқумли касалликлар шифохонасига 24 фуқаро келтирилди. Беморларни умумлаштириб турувчи факт улар бир кун олдин Самарқанд шаҳри Сиёб деҳқон бозори ҳудудида жойлашган «Бахтиёр» МЧЖга қарашли хотдог тайёрлаш шохобчасидан хотдог ва шаурма маҳсулотларини истеъмол қилишганидир. Фалокат бир келса қўша келади, деганларидай, 10 октябрь куни ҳам Самарқанддаги иккита боғчанинг болалари овқатдан заҳарланиб, шифохонага ётқизилди. Маълум бўлишича, бу МТМлар озиқ-овқат таъминотида аутсорсинг хизматидан фойдаланади, яъни овқатни ўзи пиширмай четдан олиб келади.
8 октябрь куни Андижонда 27 киши овқатдан заҳарланди. Уларнинг асосий қисми туғилган кунни нишонлаш мобайнида торт еб касалга чалинган мактаб ўқувчиларидир.
* * *
Равшан Комилов бу ҳафтада интернет қаҳрамонига айланди. Унинг иштирокидаги видеолар қайта-қайта улашилди, минглаб изоҳлар ёзилди. У хонанда Равшан Комилов эмас, Қашқадарёнинг Миришкор тумани ҳокими Равшан Комиловдир.
Ҳокимбобо даладан ўғринча маккажўхори олиб машинасига солаётган бошқа бир бобони сенсираб қаттиқ дашном берган. «Невараларингни ҳам ўғирликка ўргатяпсанми? Виждонинг чирисин сени. Падарингга лаънат. Очингдан ўл ундан кўра. Ишла, меҳнат қил, сотиб ол!» деб таъна қилган. «Дарё» мухбири воқеанинг тагига етиш учун Миришкорга борди. Видеони туман ҳокимининг ўзи олиб тарқатгани маълум бўлди. Ҳокимнинг айтишича, бу маккажўхорининг жуда қиммат нави бўлиб, уруғининг килоси 1 доллардан ошиқ туради. Равшан Комилов туман экспорти учун қайғуриб, «ўғри бобо»ни тергаганини айтди ҳамда қўпол сўзлари учун халқдан узр сўради.
Мавзуга доир:
Охирги вақтда кетма-кет мағлубиятлари билан мухлислар ҳафсаласини пир қилаётган Ўзбекистон МТЖ ниҳоят барчанинг юзига қувонч улашди. Футбол бўйича Ўзбекистон терма жамоаси ЖЧ—2022 саралашининг иккинчи босқичи 3-туридан ўрин олган Яманга қарши баҳсда йирик ҳисобда зафар қучди. Бош мураббий Вадим Абрамов ўйиндан сўнг «Жуда қийин вазиятда эдик, натижа ўйинга мос бўлди», деди. Яман терма жамоаси бош мураббийси эса ўзбекистонликларнинг ғалабасига тажрибани сабаб қилиб кўрсатди.
* * *
Ашхободда 11 октябрь куни МДҲ давлат раҳбарлари кенгаши мажлиси бўлиб ўтди. Унда Шавкат Мирзиёев иштирок этди, Туркманистон, Тожикистон, Молдова президентлари, Арманистон бош вазири билан учрашди. 2020-йилда МДҲга раислик Ўзбекистонга ўтади. Шавкат Мирзиёев Ўзбекистоннинг МДҲга раислиги давомида асосий эътибор нималарга қаратилишини маълум қилди. Бунинг учун махсус концепция ишлаб чиқилган.
* * *
АОКА директори Комил Алламжонов Самарқандда ЕХҲТга аъзо мамлакатлар элчилари иштирокидаги Ўзбекистонда сўз ва матбуот эркинлигига бағишланган халқаро давра суҳбатида сўзлаган нутқи матбуотимизнинг ҳолатига доир қатор эътирофларга бой бўлди.
Комил Исмоилович, жумладан, «Ўзбекистонда қарийб 25 йил давомида амалда ёпиқ ва кучли цензурадан озодликка чиққан матбуот барчани эсанкиратиб қўйди. Аввалига журналистлар тажрибасизликдан қийналган бўлса, давлат ва ҳокимият органлари улар томонидан кўрсатилган аччиқ ҳақиқатни ҳазм қила олмади», деб айтди. У нутқида Ўзбекистонда матбуот эркин эмас, сўз эркинлиги йўқ, деб гапираётганларга бу ишлар бир кунда амалга ошмаслигини айтди ва бунга ташқаридан туриб қатъий ва кескин баҳо бермасликни сўради. «Рим бир кунда қурилмаганидек, ўзбек матбуоти ҳам ҳақиқий 4-ҳокимият даражасига етишига ҳали вақт керак ва биз буни яхши тушунамиз», — деб фикрини хулосалади АОКА раҳбари.
* * *
Май ойидаги «Меҳр» операциясида Яқин Шарқдаги жанггоҳлардан Ўзбекистон фуқаролари қайтарилгани эсингизда бўлса керак. Ўтган ҳафта «Меҳр 2» операцияси якунланди. Ўтган сафар фуқароларимиз Дамашқдан олиб келинган бўлса, бу гал Бағдоддан келтирилди.
Шавкат Мирзиёев топшириғига кўра махсус тузилган ишчи гуруҳ Ироқ ҳукумати ва UNICEF билан ҳамкорликда Ироқда оғир шароитда қолган 64 нафар болани Ўзбекистонга қайтарди. ЎзАнинг хабар беришича, «Меҳр 2» инсонпарварлик операцияси доирасида Ўзбекистонга олиб келинган 39 нафар ўғил ва 25 нафар қиз боланинг орасида 14 нафар 3 ёшгача бўлган ҳамда икки нафар ота-онасидан айрилган болалар бор.
Келтирилган болаларнинг аксариятининг ота-онаси ҳалок бўлган ёки Ироқ қамоқхоналарида жазо ўтамоқда.
Эслатиб ўтамиз, президент Шавкат Мирзиёев аввалроқ Яқин Шарқдан қайтарилган ватандошларимиз ҳақида тўхталиб «Уят бўлса ҳам айтиш керак, 156 нафар Сурияга кетганлар нима учун кетган? Кимни излаб кетган? Тан олиш керак, биз уларга шароит яратиб бермаганимиз учун кетган!..», деган эди.
«Дарё» янгиликларини кузатиб боринг. Ўзбекистон ва дунё хабарларидан энг биринчи хабардор бўлинг.
Изоҳ (0)