Alisher Usmonov Rossiyaning eng badavlat kishilari ro‘yxatida 7-o‘rinni egalladi. 9 oyda uning boyligi 1,56 mlrd dollarga ko‘paygan

Rossiyaning eng badavlat kishilariga tegishli jami mol-mulk joriy yilning 9 oyi davomida 30,613 milliard dollarga ko‘paydi. Bu haqda “Kommersant” xabar bermoqda.

Bloomberg agentligi tomonidan tuzilgan Bloomberg Billionaires Index (BBI) reytingidan dunyoning eng boy 500 odami o‘rin oldi. Ulardan 23 nafari rossiyalik.

Badavlat rossiyaliklar o‘nligini “Interros” egasi va “Nornikel” bosh direktori Vladimir Potanin 24,3 milliard dollar bilan boshlab bergan. To‘qqiz oy davomida uning boyligi 4,64 milliard dollarga ko‘paygan. U dunyo reytingida 35-o‘rinda qayd etilgan.

USM xoldingi asoschisi Alisher Usmonov badavlat rossiyaliklar o‘nligida 15,7 milliard dollar bilan 7-o‘rinni egalladi. Uning boyligi 9 oyda 1,56 milliard dollarga oshgan. Usmonov dunyo reytingida 75-o‘rinni band etib turibdi.

Shuningdek, eng boy rossiyaliklar o‘nligidan Leonid Mixelson, Vladimir Lisin, Aleksey Mordashov, Vagit Alekperov, Gennadiy Timchenko, Roman Abramovich, Andrey Melnichenko va Viktor Vekselberg ham o‘rin oldi.