Алишер Усмонов Россиянинг энг бадавлат кишилари рўйхатида 7-ўринни эгаллади. 9 ойда унинг бойлиги 1,56 млрд долларга кўпайган

Россиянинг энг бадавлат кишиларига тегишли жами мол-мулк жорий йилнинг 9 ойи давомида 30,613 миллиард долларга кўпайди. Бу ҳақда «Коммерсантъ» хабар бермоқда.

Bloomberg агентлиги томонидан тузилган Bloomberg Billionaires Index (BBI) рейтингидан дунёнинг энг бой 500 одами ўрин олди. Улардан 23 нафари россиялик.

Бадавлат россияликлар ўнлигини «Интеррос» эгаси ва «Норникел» бош директори Владимир Потанин 24,3 миллиард доллар билан бошлаб берган. Тўққиз ой давомида унинг бойлиги 4,64 миллиард долларга кўпайган. У дунё рейтингида 35-ўринда қайд этилган.

USM холдинги асосчиси Алишер Усмонов бадавлат россияликлар ўнлигида 15,7 миллиард доллар билан 7-ўринни эгаллади. Унинг бойлиги 9 ойда 1,56 миллиард долларга ошган. Усмонов дунё рейтингида 75-ўринни банд этиб турибди.

Шунингдек, энг бой россияликлар ўнлигидан Леонид Михелсон, Владимир Лисин, Алексей Мордашов, Вагит Алекперов, Геннадий Тимченко, Роман Абрамович, Андрей Мелниченко ва Виктор Векселберг ҳам ўрин олди.