2023-yilga kelib Turkiya yiliga 75 milliondan ortiq turistni qabul qilish va sayohatlar industriyasida 65 milliard dollar ishlab olishni rejalashtirmoqda. Bu haqda “RIA Novosti” xabar bermoqda.
Mamlakat madaniyat va turizm vaziri Mexmet Ersoy asosiy maqsadi sayyohlar oqimini ikki baravar ko‘paytirish bo‘lgan Turkiyada turizm strategiyasini taqdim etdi.
Buning uchun rasmiylar mamlakatda badavlat sayyohlarni jalb etmoqchi. Ular uchun yangi turistik mahsulotlar ishlab chiqilmoqda. Jumladan, gastronomik loyiha va yo‘nalishlar alohida brend ostida ilgari suriladi.
Sog‘lomlashtirish va tibbiy turizmga alohida etibor beriladi. Shuningdek, veloturizmni rivojlantirish uchun maxsus yo‘laklar va yo‘nalishlar, velosipedchilar uchun mehmonxonalar ochilishi ko‘zda tutilgan. 2023-yilga kelib bunday obyektlar soni 100 tadan 1500 taga yetadi.
Ekologik turizmni rivojlantiradigan mintaqa va kurortlar davlat tomonidan qo‘llab-quvvatlanadi. Green Star sertifikatiga ega mehmonxonalar va “moviy bayroq” bilan taqdirlangan plyajlar sonini uchdan birga ko‘paytirish strategik jihatdan muhim deb topildi.
Mehmonlar joylashadigan manzillar sonini ko‘paytirishga ham e’tibor qaratiladi. Vazirga ko‘ra, 4 yildan so‘ng Turkiyada 2,5 million mehmonxona o‘rni bo‘ladi.
Ma’lumot uchun, hozir Turkiya turistlar soni bo‘yicha dunyoda 6-o‘rinda turadi. O‘tgan yili mamlakatga xorijdan 39,5 million sayyoh kelgan.
Izoh (0)