Ta’lim sifatini nazorat qilish davlat inspeksiyasi “Munosabat” ko‘rsatuvida maktablar reytingi natijalari noto‘g‘ri talqin qilingan deb munosabat bildirdi. Bu haqda inspeksiyaning matbuot xizmati ma’lum qildi.
Avvalroq O‘zbekistonda birinchi marta maktablar reytingi e’lon qilingandi. Reyting natijalari ommaviy axborot vositalari orqali yoritilib muhokamalarga sabab bo‘lgan.
Mavzuga doir: Maktablar reytingini aniqlash jarayonida uchragan soxtalashtirish holatlari haqida ma’lumot berildi
“Xalq ta’limi vazirligi mutasaddilari tomonidan Prezident farmoni ijrosi yuzasidan tashkil etilgan maktab reytinglarining ‘kamchiliklari ko‘p va natijadorligi yaxshi emas’ deyilgan, vaholanki maktablar reytingini tuzish bilan bog‘liq barcha jarayonlar boshidan oxirigacha Ta’lim inspeksiyasi va Xalq ta’limi vazirligi bilan kelishilgan holda tashkil qilgan. Vazirlik mutasaddisi o‘zining bu fikri bilan Prezident topshirig‘i bo‘yicha bajarilgan ishga o‘zining mutlaqo e’tiborsizligini ko‘rsatgan”, — deb yoziladi munosabatda.
Ko‘rsatuvda boshqa ishtirokchilar tomonidan “maktablarda sifat yo‘q, sifat yo‘q bo‘lsa, reyting kimga kerak“, degan fikrlar ham bildirilgan.
“Maktablarda sifat yo‘q bo‘lsa, Xalq ta’limi vazirligi tomonidan amalga oshirilayotgan ishlar hech qanday natijaga ega emas, degan xulosa paydo bo‘lishi kerak. Yoki vazirlik mutasaddisi tomonidan maktab reytinglarini noto‘g‘ri talqin qilinganligi, ushbu reytingni amalga oshiruvchi hamkor tashkilot rahbariyati sifatida uning o‘z tizimida qilayotgan ishlarini muvaffaqiyatsiz amalga oshirilayotganligidan dalolat beradi”, — deb qo‘shimcha qilinadi.
Ma’lumotda aytilishicha, reyting O‘zbekistonda maktablar soni 10 mingtaga yaqinligi sabab, Xalq ta’limi vazirligi tomonidan tavsiya etilgan 956 (umumiy maktablarning 10 %i) maktabda nazorat ishi va ijtimoiy so‘rovnoma o‘tkazish asosida tuzilgan.
Qo‘shimcha qilinishicha, jarayonning shaffofligi va sifatini ta’minlash uchun 200 dan ortiq mutaxassisdan iborat 57 ta ishchi guruh tuzilgan. Reyting natijalari “reyting.tdi.uz” saytida muassasalar kesimida har bir indikator bo‘yicha aniq ballar bilan e’lon qilingan.
Bundan tashqari, Toshkent shahri bo‘yicha ham 10 % maktablar tanlangan bo‘lib, Prezident maktabiga tanlovda eng ko‘p o‘quvchi qabul qilingan Sergeli tumanidagi 300-sonli umumta’lim maktabi reytingda Toshkent shahri bo‘yicha 3-o‘rinni egallagan.
Izoh (0)