Таълим сифатини назорат қилиш давлат инспекцияси «Муносабат» кўрсатувида мактаблар рейтинги натижалари нотўғри талқин қилинган деб муносабат билдирди. Бу ҳақда инспекциянинг матбуот хизмати маълум қилди.
Аввалроқ Ўзбекистонда биринчи марта мактаблар рейтинги эълон қилинганди. Рейтинг натижалари оммавий ахборот воситалари орқали ёритилиб муҳокамаларга сабаб бўлган.
Мавзуга доир: Мактаблар рейтингини аниқлаш жараёнида учраган сохталаштириш ҳолатлари ҳақида маълумот берилди
«Халқ таълими вазирлиги мутасаддилари томонидан Президент фармони ижроси юзасидан ташкил этилган мактаб рейтингларининг ‘камчиликлари кўп ва натижадорлиги яхши эмас’ дейилган, ваҳоланки мактаблар рейтингини тузиш билан боғлиқ барча жараёнлар бошидан охиригача Таълим инспекцияси ва Халқ таълими вазирлиги билан келишилган ҳолда ташкил қилган. Вазирлик мутасаддиси ўзининг бу фикри билан Президент топшириғи бўйича бажарилган ишга ўзининг мутлақо эътиборсизлигини кўрсатган», — деб ёзилади муносабатда.
Кўрсатувда бошқа иштирокчилар томонидан «мактабларда сифат йўқ, сифат йўқ бўлса, рейтинг кимга керак«, деган фикрлар ҳам билдирилган.
«Мактабларда сифат йўқ бўлса, Халқ таълими вазирлиги томонидан амалга оширилаётган ишлар ҳеч қандай натижага эга эмас, деган хулоса пайдо бўлиши керак. Ёки вазирлик мутасаддиси томонидан мактаб рейтингларини нотўғри талқин қилинганлиги, ушбу рейтингни амалга оширувчи ҳамкор ташкилот раҳбарияти сифатида унинг ўз тизимида қилаётган ишларини муваффақиятсиз амалга оширилаётганлигидан далолат беради», — деб қўшимча қилинади.
Маълумотда айтилишича, рейтинг Ўзбекистонда мактаблар сони 10 мингтага яқинлиги сабаб, Халқ таълими вазирлиги томонидан тавсия этилган 956 (умумий мактабларнинг 10 %и) мактабда назорат иши ва ижтимоий сўровнома ўтказиш асосида тузилган.
Қўшимча қилинишича, жараённинг шаффофлиги ва сифатини таъминлаш учун 200 дан ортиқ мутахассисдан иборат 57 та ишчи гуруҳ тузилган. Рейтинг натижалари «reyting.tdi.uz» сайтида муассасалар кесимида ҳар бир индикатор бўйича аниқ баллар билан эълон қилинган.
Бундан ташқари, Тошкент шаҳри бўйича ҳам 10 % мактаблар танланган бўлиб, Президент мактабига танловда энг кўп ўқувчи қабул қилинган Сергели туманидаги 300-сонли умумтаълим мактаби рейтингда Тошкент шаҳри бўйича 3-ўринни эгаллаган.
Изоҳ (0)