Surxondaryo viloyati Muzrabot tumani ma’muriy sudida farzandining moddiy ta’minotidan bo‘yin tovlab kelayotgan uch otaga sud hukmi o‘qildi, deb xabar bermoqda O‘zA.
“Ular otalik majburiyatini unutib, ancha vaqtdan buyon aliment to‘lashdan bo‘yin tovlab kelgani sababli yirik miqdordagi qarzdorlikni yuzaga keltirgan”, — degan Majburiy ijro byurosi viloyat boshqarmasi katta inspektori Q.Tursunov.
Jumladan, “Gulobod” mahallasida yashovchi Shobani Oralov (ism-shariflar o‘zgartirildi) bir farzandi uchun 5 million 640 ming so‘m, “Darband” mahallasida yashaydigan Farhod Nozimov 4 million 352 ming so‘m hamda “Fayziobod” mahallasida yashovchi Bahodir Doniyorov ikki farzandiga 36 million 445 ming so‘m aliment pulini to‘lamay kelgan.
MIBning Muzrabot tumani bo‘limi aliment qarzdorligini to‘lamagan otalarga nisbatan tegishli chora ko‘rishni so‘rab, tuman ma’muriy sudiga murojaat etgan.
To‘plangan hujjatlar o‘rganib chiqilib, voyaga yetmagan farzandining moddiy ta’minotidan bo‘yin tovlagan bu shaxslarning har biriga Ma’muriy javobgarlik to‘g‘risidagi kodeksning tegishli moddasiga asosan, 15 sutkadan ma’muriy qamoq jazosi belgilangan. Amaldagi qonunga ko‘ra, ularning bu jazoni o‘tab chiqishi aliment qarzdorligini to‘lashdan ozod etmaydi.
Bundan avval Surxondaryoda ikki marta oila qurib, har ikkalasidan ham ajrashib ketgan ota 154 million so‘m aliment to‘lagani, Farg‘onaning Rishton va Quva tumanlarida erkak aliment to‘lamaslik uchun MIB xodimiga jarohat yetkazgani, qashqadaryolik erkak esa aliment sabab sobiq xotinini bo‘g‘ib o‘ldirgani haqida xabar berilgandi.
Izoh (0)