O‘zbekiston mudofaa vaziri general-mayor Bahodir Qurbonov Qozog‘iston mudofaa vazirini qabul qildi

13-sentabr, juma kuni O‘zbekiston mudofaa vaziri general-mayor Bahodir Qurbonov rasmiy tashrif bilan kelgan Qozog‘iston mudofaa vaziri general-mayor Nurlan Yermekbayev boshchiligidagi delegatsiyani qabul qildi. Bu haqda Mudofaa vazirligi Axborot va ommaviy kommunikatsiyalar departamenti “Daryo”ga ma’lum qildi.

Mudofaa vazirligi Markaziy apparatida bo‘lib o‘tgan ikki tomonlama hamkorlik uchrashuvida general-mayor Bahodir Qurbonov qozog‘istonlik hamkasbini O‘zbekistonga uyushtirgan tashrifi bilan qutlab, mustaqillik yillarida ikki davlat o‘rtasida o‘rnatilgan do‘stona harbiy munosabatlarning faqat ijobiy tomonga siljib borayotganini ta’kidladi.

Shuningdek, O‘zbekiston mudofaa vaziri ikki tomonlama hamkorlikdagi erishilayotgan yutuqlarga to‘xtalar ekan, har ikki davlat harbiylarining “ArMI—2019” xalqaro musobaqalarda erishgan yuqori natijalariga alohida urg‘u berdi. O‘zbekiston va Qozog‘iston mezbonlik qilgan bellashuvlar yuqori saviyada tashkillashtirilgani aytib o‘tildi.

Ikki davlat mudofaa vazirlari harbiy sohada erishilgan yutuqlar va kelgusida amalga oshirilishi rejalashtirilayotgan masalalar borasida ham hamkorlikni davom ettirishning istiqbolli takliflari bilan chiqdi.

Qozog‘iston Respublikasi harbiy delegatsiyasi mudofaa vaziri Bahodir Qurbonov hamrohligida Mustaqillik maydonidagi “Motamsaro ona” haykali poyiga gulchambar qo‘ydi.