Сурхондарё вилояти Музработ тумани маъмурий судида фарзандининг моддий таъминотидан бўйин товлаб келаётган уч отага суд ҳукми ўқилди, деб хабар бермоқда ЎзА.
«Улар оталик мажбуриятини унутиб, анча вақтдан буён алимент тўлашдан бўйин товлаб келгани сабабли йирик миқдордаги қарздорликни юзага келтирган», — деган Мажбурий ижро бюроси вилоят бошқармаси катта инспектори Қ.Турсунов.
Жумладан, «Гулобод» маҳалласида яшовчи Шобани Оралов (исм-шарифлар ўзгартирилди) бир фарзанди учун 5 миллион 640 минг сўм, «Дарбанд» маҳалласида яшайдиган Фарҳод Нозимов 4 миллион 352 минг сўм ҳамда «Файзиобод» маҳалласида яшовчи Баҳодир Дониёров икки фарзандига 36 миллион 445 минг сўм алимент пулини тўламай келган.
МИБнинг Музработ тумани бўлими алимент қарздорлигини тўламаган оталарга нисбатан тегишли чора кўришни сўраб, туман маъмурий судига мурожаат этган.
Тўпланган ҳужжатлар ўрганиб чиқилиб, вояга етмаган фарзандининг моддий таъминотидан бўйин товлаган бу шахсларнинг ҳар бирига Маъмурий жавобгарлик тўғрисидаги кодекснинг тегишли моддасига асосан, 15 суткадан маъмурий қамоқ жазоси белгиланган. Амалдаги қонунга кўра, уларнинг бу жазони ўтаб чиқиши алимент қарздорлигини тўлашдан озод этмайди.
Бундан аввал Сурхондарёда икки марта оила қуриб, ҳар иккаласидан ҳам ажрашиб кетган ота 154 миллион сўм алимент тўлагани, Фарғонанинг Риштон ва Қува туманларида эркак алимент тўламаслик учун МИБ ходимига жароҳат етказгани, қашқадарёлик эркак эса алимент сабаб собиқ хотинини бўғиб ўлдиргани ҳақида хабар берилганди.
Изоҳ (0)