O‘zbekiston Prezidenti Shavkat Mirziyoyev 2-sentabr kuni Islom Karimov nomidagi ilmiy-ma’rifiy yodgorlik majmuasiga tashrif buyurdi. O‘zbekistonning Birinchi Prezidenti haykali poyiga gulchambar qo‘yib, uning yorqin xotirasiga hurmat bajo keltirdi. Bu haqda Prezident matbuot xizmati xabar berdi.
Davlat rahbari Shavkat Mirziyoyevning qaroriga ko‘ra, Islom Karimov vafot etgan 2-sentabr Xotira kuni sifatida yod etiladi.
“Birinchi Prezidentning qat’iyati va jasorati bilan yurtimiz mustaqillikka erishgan, taraqqiyot yo‘lida ulkan muvaffaqiyatlarni qo‘lga kiritgan. Islom Karimovni qancha e’zozlasak, xalqimizga, yoshlarimizga ma’naviyat yetkazgan bo‘lamiz”, — deb ta’kidlagan Shavkat Mirziyoyev.
Tashrif doirasida Qur’on tilovat qilindi. Birinchi Prezident hayoti va faoliyati, orzu-istaklari, mamlakatda tinchlik-osoyishtalikni ta’minlashdagi xizmatlari yodga olindi.
Gul qo‘yish marosimida parlament va hukumat a’zolari, fan va madaniyat namoyondalari, ziyolilar, yoshlar ishtirok etdi.
Shuningdek, Islom Karimovning Samarqand va Qarshi shaharlaridagi haykallari poyiga ham gullar qo‘yildi.
Izoh (0)