Ўзбекистон Президенти Шавкат Мирзиёев 2 сентябрь куни Ислом Каримов номидаги илмий-маърифий ёдгорлик мажмуасига ташриф буюрди. Ўзбекистоннинг Биринчи Президенти ҳайкали пойига гулчамбар қўйиб, унинг ёрқин хотирасига ҳурмат бажо келтирди. Бу ҳақда Президент матбуот хизмати хабар берди.
Давлат раҳбари Шавкат Мирзиёевнинг қарорига кўра, Ислом Каримов вафот этган 2 сентябрь Хотира куни сифатида ёд этилади.
«Биринчи Президентнинг қатъияти ва жасорати билан юртимиз мустақилликка эришган, тараққиёт йўлида улкан муваффақиятларни қўлга киритган. Ислом Каримовни қанча эъзозласак, халқимизга, ёшларимизга маънавият етказган бўламиз», — деб таъкидлаган Шавкат Мирзиёев.
Ташриф доирасида Қуръон тиловат қилинди. Биринчи Президент ҳаёти ва фаолияти, орзу-истаклари, мамлакатда тинчлик-осойишталикни таъминлашдаги хизматлари ёдга олинди.
Гул қўйиш маросимида парламент ва ҳукумат аъзолари, фан ва маданият намоёндалари, зиёлилар, ёшлар иштирок этди.
Шунингдек, Ислом Каримовнинг Самарқанд ва Қарши шаҳарларидаги ҳайкаллари пойига ҳам гуллар қўйилди.
Изоҳ (0)