Surxondaryo viloyati hokimi To‘ra Bobolov Termiz buyum hamda oziq-ovqat bozorlariga tashrif buyurib, u yerdagi shart-sharoitlar bilan yaqindan tanishdi, deb xabar beradi viloyat hokimligi matbuot xizmati.
Viloyat hokimi o‘z tashrifini Termiz buyum bozorida tashkil qilingan maktab yarmarkasi faoliyati bilan tanishishdan boshladi. Tadbirkorlar tomonidan 26 turda tavsiya qilinayotgan o‘quv qurollari, maktab uchun zarur boshqa anjomlar, kiyim-kechaklar narxi bilan qiziqdi.
Hozirda viloyatda maktab yarmarkalarining 94 tasi umumiy o‘rta ta’lim maktablarida, 22 tasi aholi gavjum bozorlar hududi va atroflarida, 40 tasi savdo kompleksi va do‘konlarda tashkil etilgan.
Tashrif davomida viloyat hokimi xaridorlar bilan gavjum maktab yarmarkasida aholi uchun yaratilgan qulayliklar, mahsulotlarning narxi va sifati, to‘liqligi va zaxirasini o‘rgandi. O‘quv qurollari va kiyimlarning to‘liq bo‘lishi, narxlarning oshib ketmasligi, sotuvchilarning o‘z ishiga vijdonan yondashishi bo‘yicha tavsiyalarini berdi.
Viloyat hokimi sotuvchilar va xaridorlar bilan suhbatlashdi.
“Yurtimizda ko‘plab xayrli ishlar amalga oshirilayotgan bir paytda bozorlarimizdagi ahvol ham shunga yarasha bo‘lishi kerak. Bugun nimadir qimmatligini bahona qilib, narxlarni osongina oshirib olish kerak emas. Muomalangizdan, ko‘rsatayotgan xizmatingizdan, tavsiya etayotgan mahsulotingiz sifati va narx-navosidan odamlarning ko‘ngli to‘lib qaytsin. Shunda ishingizda unum, bozoringizda baraka bo‘ladi”, — dedi To‘ra Bobolov sotuvchilarga.
Izoh (0)