Dog‘iston politsiyasi ish masalasida aldanib, qiyin ahvolda qolgan o‘zbekistonlik ikki nafar fuqaroga yordam berdi. Bu haqda Dog‘iston IIV matbuot xizmati xabar berdi.
Ma’lum bo‘lishicha, Dog‘iston IIVning “ishonch telefoni”ga o‘zbekistonlik Hamid Saidov qo‘ng‘iroq qilib, Maxachqala shahri yaqinida “mushkul holatda qolgan” akasi Komiljon Matyoqubov va uning xotini Surayyo Nazarovani topish hamda vatanga qaytarishni so‘ragan.
Uning so‘zlariga ko‘ra, 2019-yilning iyun oyi boshida Sergey ismli shaxsning taklifi bilan er-xotin pul topish uchun Xorazmning Pitnak shahridan Dog‘istonning Maxachqala shahriga borgan. Sergey ularni Arsen ismli shaxs bilan tanishtirgan bo‘lib, ular bu shaxsning uyida ishlashi kerak bo‘lgan.
Ular 2 oy davomida tekinga ishlab berishga, evaziga Arsen ularga ishlash uchun ruxsat beruvchi tegishli hujjatlarni rasmiylashtirib berish va oziq-ovqat bilan ta’minlashni o‘z zimmasiga olishga kelishgan. Shundan so‘ng ularga bajarishi lozim bo‘lgan ishlarni tushuntirib, uyi yaqinidagi vagonchaga joylashtirgan.
Ular 3 oy davomida qoramol boqqan. Keyinchalik Arsen va Komiljon o‘rtasida janjal kelib chiqqan va er-xotinni ko‘chaga haydab, ishlab topgan pullarini bermagan.
Qo‘ng‘iroq qilgan erkak ayni paytda akasi va uning xotini qiyin ahvolda ekanligi, mahalliy yer, qayerda ekanliklari va rus tilini bilmasliklari, qaytib kelish uchun ham pullari yo‘qligini aytgan.
“Levashin tumani politsiyachilari O‘zbekiston fuqarolari qayerda ekanini aniqlab, ularni tuman bo‘limiga olib keldi va yaqin vaqt ichida vatanga qaytishlariga yordam beradi”, — deyiladi Dog‘iston IIV xabarida.
Izoh (0)