Самарқандда вилоят ҳокими раислигида янги ўқув йили олдидан видеоселектор йиғилиши ўтказилган. Zarnews’нинг хабар беришича, йиғилишда кейинги вақтларда халқ таълими тизимида шаклга катта эътибор қаратилиб, мазмун ва сифат масаласи четда қолгани таъкидланган.
Оқибатда Ўзбекистон мактабларининг миллий рейтингида Самарқанд вилояти 13-ўринга тушиб қолган. Аксарият туманлардаги мактаблар рейтингнинг энг қуйи ўринларида қайд этилган.
«Самарқанд шаҳри ва тумани, Ургут, Тойлоқ, Паяриқ ва Пастдарғом туманларидаги таълим сифати паст бўлган 10 тадан мактабга видеокузатув ускуналари ўрнатилади. Қолган туманларда ҳам худди шу тартибда 5 тадан мактабларнинг синфхоналари, ўқитувчилар хонаси, керак бўлса ҳовлисига ҳам камералар ўрнатилади», — деб таъкидлаган вилоят ҳокими Эркин Турдимов.Бунинг учун туман, шаҳар ҳокимликларининг захира фондидан маблағ ажратилади, белгиланган ишлар 10 сентябрга қадар якунланиши шарт. «Бу аввало таълим сифати паст мактабларда жамоатчилик назоратини амалга оширишга хизмат қилади. Вилоят ҳокимига ҳам кириш имконини берувчи тизим 24 соат ишлаши керак», — деб ёзмоқда Zarnews.
Изоҳ (0)