15-avgust kuni teletomoshabinlar uchun “Yoshlar” telekanalining yangi logotipi va mutlaqo o‘zgacha dizayni taqdim etiladi. Bu haqda telekanal direktori Qobuljon Ahmedov Facebook’dagi sahifasida xabar qildi.
“Bir oydan ortiqroq vaqt mobaynida yangiliklar ustida ishladik (nimaga atrof jim-jit deb o‘ylamang, shoshilinch qarorlar va namoyishkorona ochkobozlikdan yiroqmiz). Sharoit va imkoniyatdan kelib chiqqan holda yangi mavsum uchun qator sovg‘alarni tayyorlayapmiz.‘Yoshlar’da yaxshi jamoa bor! Ijodiy ‘perezagruzka’dan keyin qudratimizga tobora ishonib bormoqdamiz.
Maqsad aniq — biz bachkana yoki ko‘ngilochar kanal yaratmaymiz (ko‘pchilik negadir shu fikrda yuribdi ekan). Yoshlar, ota-onalar, xotin-qizlar, xullas barcha teletomoshabinning dardini tinglab, unga davo bo‘ladigan, ularni yaxshilikka yo‘naltirib, kerakli motivatsiya beradigan, yangicha jamiyatning yangicha a’zolari shakllanishiga hissa qo‘shadigan dasturlar tayyorlaymiz”, — deydi Qobuljon Ahmedov.
“Hurmatli do‘stlar! ‘Yoshlar’ telekanalini o‘zgartirish uchun men va jamoaning kuchi kamlik qiladi. Qanday taklif, mulohaza, tanqid bo‘lsa marhamat (iddao bo‘lmasa bo‘ldi)! Tez kunda yangiliklarni e’lon qilaman.
Takliflarni istalgan usulda yo‘llashingiz mumkin”, — deb qo‘shimcha qildi “Yoshlar” telekanali direktori.
Izoh (0)