Majburiy ijro byurosi Qo‘qondagi spagetti sexidagi o‘g‘rilikni fosh qildi. Bu haqda MIB matbuot xizmati “Daryo”ga xabar berdi.
Majburiy ijro byurosi Qo‘qon shahar bo‘limi tezkor xodimlari tomonidan shahardagi spagetti ishlab chiqarish korxonasida energiya resurslari ta’minotidan foydalanishning qonuniyligi tekshirilganida “Elektr energiyasidan foydalanish qoidalari”ga zid ravishda umumiy foydalanishdagi elektr tarmog‘iga noqonuniy ravishda hech qanday shartnoma rasmiylashtirmasdan o‘zboshimchalik bilan ulanib olib, elektr energiyasidan tekin foydalanib kelayotganligi holati aniqlangan.
“Farg‘ona hududiy elektr tarmoqlari” AJ mutaxassislari tomonidan 2019-yilning 29-iyunida berilgan yakuniy qayta hisob-kitob xulosasiga ko‘ra, korxona tomonidan 15 oy davomida 744 224 kilovatt soat yoki 246 million 338 ming so‘mlik elektr energiyasi o‘g‘irlanganligi ma’lum bo‘ldi.
Korxona ish yurituvchisi R. Aliyorov tergovga qadar tekshiruv davrida davlatga yetkazilgan zararni to‘lashdan qat’iy bosh tortgan.
Hozirda korxona ish yurituvchisi R. Aliyorovga nisbatan O‘zbekiston Respublikasi JKning 185-moddasi 4-qismi bilan jinoyat ishi qo‘zg‘atilib, dastlabki tergov harakatlari olib borilmoqda.
Izoh (0)