Milliy matbuot markazida “Jasliq” koloniyasini tugatish to‘g‘risidagi qaror ijrosi va mazmun-mohiyatiga bag‘ishlangan matbuot anjumani bo‘lib o‘tdi. Bu haqda O‘zA xabar berdi.
Jurnalistlar tomonidan berilgan “O‘zbekistonda mavjud jazoni o‘tash joylarida ibodat qilishga ruxsat etiladimi?”, savoliga Ichki ishlar vazirligi mutasaddilari aniqlik kiritdi.
Unga ko‘ra, jazoni o‘tash joylarida o‘rnatilgan yagona tartib, kun rejasi mavjud. Mahbuslar mazkur tartibni buzmagan holda o‘z diniy e’tiqodlaridan kelib chiqib, diniy amallarini bajarishi mumkin.
Diniy amallarni bajarish O‘zbekistondagi hech qaysi jazoni o‘tash joylarida taqiqlanmagan. Ro‘za oylarida ularni ovqatga majburlash yoki boshqa ibodatlarini buzish holatlari kuzatilmagan. Bu haqda Ichki ishlar jazoni ijro etish bosh boshqarmasi boshlig‘i Jamshid Sultonov ma’lum qildi.
Eslatib o‘tamiz, ayni paytda mahbuslarni 1 oy davomida yashash joylariga yaqin bo‘lgan hududdagi koloniyaga jo‘natilishi kutilmoqda. Shuningdek, “Jasliq”da faoliyat yuritayotgan xodimlar ham xuddi shu tizimda hududlar bo‘yicha ishga joylashtiriladi.
Izoh (0)