Prezidentning Samarqand viloyatiga tashrifi davomida berilgan topshiriqlar ijrosini ta’minlash uchun Samarqand shahrining ayrim hududlarida turar joy va noturar joy binolarini ko‘chirish ishlari amalga oshirilmoqda.
Mazkur hududlarda ko‘chirish ishlarini o‘rnatilgan tartibda amalga oshirish uchun Vazirlar Mahkamasi farmoyishiga asosan respublika budjeti hisobidan viloyat mahalliy budjetiga joriy yil yakuniga qadar qaytarib berish sharti bilan 150 milliard so‘m miqdorida qisqa muddatli budjet ssudasi ajratilgan.
Bugungi kunda Samarqand shahrida buzilishga tushgan hududlarda jami 160 ta obyekt egalariga kompensatsiya tariqasida jami 33,89 milliard so‘m moliyalashtirilib, belgilangan tartibda ko‘chirish ishlari amalga oshirilmoqda.
Ayni kunlarda Samarqand shahrida shaharsozlik infratuzilmasini rivojlantirish va sayyohlik potensialini yanada rivojlantirish maqsadida Samarqand shahrining 2040-yilgacha mo‘ljallangan bosh rejasi “Toshkentboshplan LITI” DUK bosh loyiha instituti hamda xorijlik konsultant-arxitektorlar bilan birgalikda qayta ishlab chiqilmoqda. Shu bilan birga, shaharning tarixiy qismini batafsil rejalashtirish loyihasi ham ishlanmoqda.
Bosh rejada “Samarkand siti” turistik zonasi tashkil etilishi, ushbu zona hududida Samarqand shahrida 2022-yilda o‘tkazilishi mo‘ljallangan ShHTning navbatdagi sammiti tadbiri uchun xizmat ko‘rsatuvchi obyektlar, shuningdek, kongress-zal, mehmonxonalar qurilishi rejalashtirilgan.
Izoh (0)