O‘zbekiston bosh vaziri o‘rinbosari — Moliya vaziri Jamshid Qo‘chqorov: “Toshkentdan yangi uyni uch yil ichida sotishda poytaxtda propiskasi borlar va yo‘qlarga ikki xil ko‘rinishda to‘lov belgilanganligi masalasida “tosh-tarozini to‘g‘rilash”ni o‘ylab ko‘rish kerak”. Qo‘chqorov bu haqda jurnalistlar bilan bo‘lib o‘tgan ochiq muloqotda aytib o‘tdi, deya xabar bermoqda “Daryo” muxbiri Musulmonbek Ibrohimov.
Jamshid Qo‘chqorov bozor iqtisodiyotida “tarozi” buzilmasligi uchun narxlar bozor talabiga moslashayotganini bildirdi. Bunga misol tariqasida 2017-yilda dollarni erkin konvertatsiya qilingani va benzin narxlari poytaxtda ham, viloyatlarda ham tenglashtirilganini aytib o‘tdi.
“Bozor iqtisodiyotida odamlar yoki iqtisodiy subyektlar bir-biriga tovar va xizmatlarni erkin, o‘zi xohlagan narxda sotadi va bunda o‘lchov birligi ham obyektiv bo‘ladi. O‘lchov birligi nima? O‘lchov birligi — pul. Bozor iqtisodiyotida, tushunishim bo‘yicha, ‘tarozi’ buzilmasligi kerak”, — dedi moliya vaziri.
Shu o‘rinda qayd etish o‘rinliki, Toshkent shahri va Toshkent viloyatida doimiy ro‘yxatda turmaydigan O‘zbekiston fuqarolari ikkilamchi bozordan (eski) uy sotib ololmaydi. Birlamchi bozordan yangi uy sotib olgan taqdirda esa, uyni 3 yil ichida sotadigan bo‘lsa, eng kam oylik ish haqining 400 baravari (5-avgust holatiga ko‘ra — 81 million 92 ming so‘m) miqdorida davlat boji to‘lashi kerak. Toshkentda doimiy propiskasi bor fuqarolar esa xuddi shunday (yangi) uyni uch yil ichida sotadigan bo‘lsa, boj miqdori eng kam oylik ish haqining 10 baravaridan (2 027 300 so‘m) oshmaydi.
“Daryo” muxbiri anjuman mavzusiga taalluqli bo‘lmasa-da, aynan shu masalada vazir aytayotgan “tarozi” qanchalik buzilgani haqidagi savol bilan Jamshid Qo‘chqorovga murojaat qildi.
Vazir shunday javob berdi: “Propiskani erkinlashtirish bosqichma-bosqich amalga oshirilmoqda, oldinga siljish bo‘lyapti. Eng kam ish haqining 400 baravari miqdoridagi to‘lov masalasini o‘ylab ko‘ramiz. Siz juda to‘g‘ri aytyapsiz, buning ‘tosh-tarozi’sini to‘g‘rilashga harakat qilamiz, chorasini ko‘ramiz. Bu masalaga yana qaytamiz”.
Izoh (0)