O‘zA muxbiri Karimberdi To‘ramurodning Qashqadaryo viloyatining Yakkabog‘ tumanida bo‘lib, hududdagi vaziyatni o‘rgandi, viloyat hokimi bilan suhbatlashdi.
Qashqadaryo viloyat Yakkabog‘ tumani deyilsa, bugun dunyoning eng chekkasidagi odam ham biladigan, “Hokim o‘rinbosari nima bo‘ldi ekan?” “Tadbirkorning taqdiri nima bo‘ldi ekan?” deb so‘raydigan bo‘ldi. Millionlarning e’tiborida turgan Yakkabog‘ tumaniga, oldin tuman markazi bo‘lgan Yakkabog‘ qishlog‘iga bordik.
Eng avval ko‘zimiz tushgan narsa shu bo‘ldi-ki, Yakkabog‘ ulkan qurilish maydoniga aylangan, bir tarafda yo‘lsozlar yo‘llarni kengaytirib, tekislab, asfaltlashga tayyorlashmoqda, bir tarafda elektromontyorlar yog‘och simyog‘ochlarni betoniga almashtirib, yangi sim tortmoqda. Bir tarafda ko‘priklar tuzatilib, ariqlar kavlansa, bir tarafda ustalar ko‘cha yuzidagi uylarni ta’mirlashmoqda.
“Yakkabog‘da haqiqiy bunyodkorlik ishlari ketmoqda. Ko‘z o‘ngimizda yillar davomida qarovsiz yotgan maktablar, maktabgacha ta’lim muassasalari, shifoxonalar qayta yuz ochmoqda. Nafaqat tuman, balki viloyat rahbarlari ham kechayu-kunduz Yakkabog‘da. Shu yerning o‘zida obodonlashtirish ishlari shtabi tashkil qilingan va istalgan soatda bu yerda rahbarlarni topasiz”, ‒ dedi bizni kutib olgan hokimlik matbuot xizmati rahbari Bozor Aziziy.Biz shtabda Qashqadaryo viloyat hokimi Zafarjon Ro‘ziyev mutasaddi tashkilotlarning rahbarlariga topshiriqlar berib turganiga guvoh bo‘ldik. Hali u, hali bu tarmoq rahbariga topshiriq berayotgan, qilingan ishlarning natijasini so‘rayotgan viloyat hokimini suhbatga tortish oson bo‘lmadi. Nuqul “Hozir-hozir”, degan viloyat hokimi shomga borib, biz bilan suhbatlashishga vaqt topdi. Ammo shunda ham hokimning qabulini kutib turgan yuzdan ortiq fuqarolardan uzr so‘rab, ularga “Yana yarim soatgina kutib turasizlar”, deganini eshitib, fursatimiz oz ekanini angladik va yurtdoshlarimiz javobini kutayotgan eng muhim savollargagina javob olishga harakat qildik.
Zafarjon Ro‘ziyev, avvalo, “Obod mahalla” dasturi Prezidentimiz Sh.Mirziyoyevning tashabbusi ekani va bu dasturning yuksak mohiyati haqida so‘z yuritib, tuman markazi Yakkabog‘dan ko‘chirilgach, Yakkabog‘ uzoq muddat e’tibordan chetda qolgani, qishloqning ahvoli haqiqatdan ham achinarli ahvolga kelib qolgani haqida gapirdi, ammo Yakkabog‘ endi qayta yuz ochishini, qisqa fursatda qishloq tanib bo‘lmas darajada obod bo‘lib, ertakmonand go‘shaga aylanishini aytdi.
Barcha yurtdoshlarimizni qiziqtirgan savollarga javob berar ekan, viloyat hokimi shunday dedi:
“Bizdan ham xatolik o‘tdi. Avvalo, biz, rahbarlar, hammamiz kalondimog‘ bo‘lib ketgan ekanmiz, xalqdan uzilib, manman bo‘lib ketgan ekanmiz. Bugun zamon o‘zgardi. Muhtaram Prezidentimiz katta islohotlarni boshladilar, bugun xalqning ichiga kirib, har bir oilaning dardini tinglab, uning muammosini o‘zimning muammom deb ishlashimiz kerak. Afsuski, hamma rahbar ham buni hali to‘la anglab yetgani yo‘q. Yakkabog‘ tumani hokimining o‘rinbosari ham o‘zining vakolatiga kirmaydigan ishni qilgan. Bunaqa paytda xalqning oldiga kamida tuman hokimi kelib, bo‘ladigan ishlarni o‘zi tushuntirishi kerak edi. Ular anglata olmasa, viloyat hokimi, men kelishim kerak edi. Xalq tuman va viloyat hokimiga ishonadi, o‘rinbosarlar yo boshqa idora rahbarlariga emas”.
Biz hokim o‘rinbosarining hatti-harakatiga baho berishini so‘radik.
“Albatta, u vakolatidan tashqariga chiqqani uchun ishdan olindi, hatto unga qarshi jinoiy ish qo‘zg‘atildi. Bundan tashqari o‘z ishiga e’tiborsizlik bilan qaragani uchun tuman hokimi va tuman prokurori ham ishdan olindi”, ‒ dedi Zafarjon Ro‘ziyev.
Biz tadbirkor va uning korxonasi haqida so‘radik.
‒ Tadbirkorning korxonasi buzilmaydi, qaytanga u ta’mirlab, chiroyli qilib berilayapti, tadbirkorlik ishi davom etadi, ‒ dedi viloyat hokimi. ‒ Ammo shuni aytishim lozim-ki, biz qonun ustuvor davlatda yashaymiz, qonun oldida hamma barobar, ehtirosga berilib, qonundan tashqari hatti-harakatlar sodir qilgani uchun tadbirkor ham qonun oldida javob beradi.
Eslatib o‘tamiz: tadbirkor ruhiy jihatdan tibbiy ko‘rikdan o‘tkazilmoqda, tuman hokimining o‘rinbosari esa shifoxonada davolanmoqda.
Shu o‘rinda viloyat hokimi barcha jurnalist va blogerlarga ham murojaat qildi:
“Bugun hamma narsa ochiq va shaffof, xususan, Qashqadaryoda ham va Yakkabog‘da bo‘lgan voqea borasida ham hamma savollaringizga boricha javob berishga har doim tayyorman. Kim istasa, kelsin, bu yerda bo‘layotgan ishlarni o‘z ko‘zi bilan ko‘rsin va borini yozsin! Ikki oy sabr qilishsa, barchalarini o‘zim chaqiraman, Yakkabog‘da katta bir bayram uyushtiramiz, katta osh qilamiz va barchangiz Yakkabog‘ jannatmonand bir go‘zal maskanga aylanganiga guvoh bo‘lasiz. Nasib bo‘lsa, xalqimiz bu ko‘ngilxiralikni unutib ham yuboradi va yangidan chiroy ochadigan Yakkabog‘da hamma bizdan, avvalo, Prezidentimizdan, davlatimizdan rozi bo‘lib, bundan keyin yaxshi yashaydi”.
Suhbatimizni to‘liq ravishda videolavhadan tomosha qilishingiz mumkin...
Izoh (0)