Avvalgi hafta mamlakatimizdagi ochiq-oshkoralik jarayonlarining noyob hodisasi bilan solnomaga yozilgan bo‘lsa, bu hafta hokimiyat vakillarining fuqaroga nisbatan sharmandali xatti-harakatlari bilan tarixga muhrlandi. Dayjestimizni boshlaymiz.
20-iyul kuni Yakkabog‘da sodir bo‘lgan xunuk voqeaning videosi hafta boshida internetda tarqaldi. Unda yakkabog‘lik tadbirkor buldozer rulida o‘tirgan hokim o‘rinbosari ustiga benzin sochib yoqib yuborgani aks etgan. Ma’lum bo‘lishicha, hokimlik vakillari dabdurustdan tadbirkorning binosini buzishga kelganda ko‘pchilik bo‘lib qarshilik ko‘rsatishgan. Natijada buldozerchi binoni buzishdan bosh tortgan. Shunda hokim o‘rinbosari, Tuymayev ismli kishi rulga o‘tirib o‘zi buzmoqchi bo‘lganda sabr kosasi to‘lgan tadbirkor Bahriddin Isomov ushbu qaltis choraga qo‘l urgan. Shundan so‘ng Isomov va uning o‘g‘lini IIB olib ketgan. Garchi aybi bo‘lmasa-da, uning o‘g‘lini IIB xodimlari kaltaklagan.
Bino buzilgan hududda 30 ga yaqin do‘konni ham shu hokim o‘rinbosari vayron qilgan bo‘lsa-da, hech biriga kompensatsiya to‘lanmagan.
Yuz bergan hodisa ommaviy axborot vositalarida qattiq portlash keltirib chiqardi. O‘nlab nashrlar voqeani yoritdi va tadbirkorning o‘ziga xos “samosud”ini oqlamagan holda, hokim o‘rinbosarining tiyiqsiz harakatini qoraladi. Qonunchilik palatasi deputatlari hokimlarga bildirilgan ishonchning chegarasi borligini eslatdi. Shundan so‘ng viloyat hokimi Zafar Ro‘ziyev Yakkaboqqa kelib tadbirkorlarning arzini tingladi. Jamoatchilik bosimi va faol arboblar tanqidi natijasida hokim o‘rinbosarini yoqib yuborgan tadbirkorning do‘koni buzilmaydigan bo‘ldi, Yakkabog‘ hokimi va o‘rinbosari ishdan olindi, kuygan o‘rinbosarga jinoyat ishi qo‘zg‘atildi.
* * *
22-iyul kuni Axborot va ommaviy kommunikatsiyalar agentligi anjumanlar zalida Iqtisodiyot va sanoat vaziri Botir Xo‘jayev ishtirokida o‘tgan muloqotda iste’mol savatchasi masalasi ko‘tarildi. Botir Xo‘jayevning ma’lum qilishicha, iste’mol savatchasi dunyo iqtisodiyotida amal qilinishi majburiy ko‘rsatkich emas. “O‘zbekistonda iste’mol savatchasi degan tushunchani joriy qilish taxminan 2021-yillarga mo‘ljallanmoqda. Hozir ham iste’mol savatchasi va yashash uchun eng kam miqdor tushunchalari test tizimida sinab ko‘rilmoqda va so‘rovnomalarga ko‘ra ular 650 ming va 800 ming so‘mni tashkil qiladi”, dedi Botir Xo‘jayev. Aytish lozimki, mustaqillikdan keyin iste’mol savatchasi atamasi iqtisodiyotimizda qo‘llanmaydi.
* * *
Hokimiyat va aholi o‘rtasida keskin ziddiyat keltirib chiqargan yana bir voqea Xorazm viloyatida yuz berdi. Urganch shahridagi “Ashxobod” mahallasida yashovchi aholiga Urganch tumanidan yer o‘rni ajratib berilgan, ammo kompensatsiya puli to‘lanmagandi. Hokimiyat vakillari bir qancha vaqtdan beri va’da berib kelgan, nihoyat sabr kosasi to‘lgan minglab uysiz fuqarolar 26-iyul kuni kechasi Urganch-Hazorasp avtomobil yo‘lini to‘sib qo‘ygan. Viloyat hokimi kelganda uning palatkasini yiqitib yuborishgan.
“Yuksalish” umummilliy harakati raisi Akmal Burhonov O‘zbekistonda aholi va hokimiyat vakillarining ochiq konfrontatsiyasiga sabab bo‘layotgan ko‘chmas mulklarni ommaviy buzish jarayonlaridan tashvishda ekanini ma’lum qildi. Shuningdek, adliya vaziri Ruslanbek Davletov 27-iyul kunidagi hay’at majlisida “Odamlarning uyini buzib, ko‘chaga chiqarib qo‘yib, kompensatsiya to‘lamaslik — vahshiylik!” dedi.
Shavkat Mirziyoyev aholi va hokimlik o‘rtasidagi tushunmovchilikni hal qilish uchun bosh vazirni Xorazmga yubordi. Abdulla Aripov urganchliklar bilan uchrashdi. Shundan so‘ng avtomobillarda pul keltirilib, uysizlarga kompensatsiya sifatida tarqatila boshlandi. Bosh vazir yig‘ilish o‘tkazib, Urganch shahri hokimi va prokuroriga hayfsan berdi. Bundan buyon kompensatsiya to‘lanmagan va oldindan ogohlantirilmagan turar va noturar joylarni buzish to‘xtatiladigan bo‘ldi.
* * *
Davlat test markazi rahbari Majid Karimov “Kun.uz” bilan suhbatda “bu yilgi avgust imtihonlarida o‘rniga kirish bo‘lmaydi”, dedi. Ma’lumki, abituriyentlar orasida keng tarqalgan bu firibgarlik aynan yuz tuzilishi o‘xshash talabgorlarni almashtirib qo‘yishga asoslangan usuldir. Majid Karimovning aytishicha, endilikda yuzni tanish texnologiyalari qo‘llanadi va biometrik parametrlar aniqlanadi. Biroq bu texnologiya ham mutlaqo kamchiliksiz emas. Agar bu jarayonda muammoli vaziyat chiqsa ikkinchi identifikatsiyalash jarayoni sifatida barmoq izlari solishtirib ko‘riladi. Shu tariqa “kalla”, “parovoz” deb ataluvchi usullarga chek qo‘yiladi.
* * *
Qashqadaryoning Kasbi tumanida IIB boshlig‘i fermerlarning sha’nini tahqirlaydigan harakatga qo‘l urdi. “Daryo” muxbiri Otabek Qo‘ldoshev bu hodisani o‘rgandi. IIB boshlig‘i dala seminari tashkil qilgan (aslida seminarni qishloq xo‘jaligi mutaxassisi tashkil etadi va soha sirlari bo‘yicha ma’lumot almashiladi). Seminarga 20 nafar IIB xodimi keltirilgan, shuningdek, “zekovoz” mashina ham olib kelingan. “Seminar”da 11 nafar kishining qo‘liga kishan taqilgan va 50 daraja issiqda jazirama avtobusga qamab qo‘yilgan.
“Daryo” mamlakatimizda qonun ustunligi va oshkoralik qaror topgunicha muammoli vaziyatlarni yoritaveradi. Kasbi voqeasi yechimini topgunicha OAV diqqat-e’tiborida bo‘ladi.
* * *
26-iyul kuni O‘zbekiston prezidenti Shavkat Mirziyoyev xalq hayoti bilan yaqindan tanishish va avval berilgan topshiriqlar ijrosini ko‘zdan kechirish uchun Samarqand viloyatiga tashrif buyurdi. Shavkat Mirziyoyev Samarqand xalqaro aeroportining o‘zidayoq mazkur aeroportni rivojlantirishga oid loyiha bilan tanishdi. Islom Karimov qabrini ziyorat qildi va Samarqand tumanidagi “Agromir” meva-sabzavotlarni qayta ishlash korxonasida bo‘ldi.
* * *
Toshkentda yangi aeroport terminali quriladi. Uni Shveysariya kompaniyasi bunyod etadi. Soatiga ming nafar yo‘lovchiga xizmat ko‘rsatish imkoniga ega bo‘ladi. Yangi terminalning loyihasi Humo qushi shaklida ishlab chiqilgan bo‘lib, mutaxassislar terminalning funksional maqsadi, yaratiladigan sharoit va qulayliklarga alohida e’tibor qaratgan.
Ta’kidlash lozimki, 2016-yilda yangi “Toshkent-4” xalqaro aeroporti Humo qushi ko‘rinishida bo‘lishi haqida xabar berilgan va inshoot maketi namoyish qilingandi (video). Biroq ushbu maket Humo qushidan ko‘ra kurakchani ko‘proq eslatardi. Bu hafta ko‘rsatilgan yangi chizmada esa Humo qushi tasviri yaqqol ko‘rinadi.
“Daryo” yangiliklarini kuzatib boring. O‘zbekiston va dunyo xabarlaridan eng birinchi xabardor bo‘ling.
Izoh (0)