Toshkentda Chorvachilik, parrandachilik, baliqchilik, qorako‘lchilik, asalarichilik va quyonchilik tarmoqlarini rivojlantirish bo‘yicha ustuvor yo‘nalishlarga bag‘ishlangan seminar-yig‘ilish o‘tkazildi deya ma’lum qildi vazirlik matbuot xizmati.
Ma’lumotlarga ko‘ra, bugungi kunda qoramolning 94 foizi, qo‘y va echkining 84 foizi, parrandaning 58 foizi aholi xonadonlarida boqiladi. Biroq parrandachilikda oziqaning 85 foizi import qilinib, haligacha ko‘p miqdorda soya va kungaboqar shroti, makkajo‘xori chetdan olib kelinadi. Shu boisdan yig‘ilishda mahalliy sharoitda yuqori quvvatli oziqa yem ishlab chiqarishni rivojlantirish zarurligi ta’kidlandi.
Teri, go‘sht va momiq jun olish uchun boqilayotgan quyonchilik yo‘nalishlari ham rivojlanmoqda. Jumladan, bugungi kunda aholi xonadonlari va quyonchilik xo‘jaliklarida 112 ming 600 dan ziyod quyon boqilmoqda. Ularning 66 mingdan ortig‘i zotdor quyon hisoblanadi. Kelgusida Veterinariya va chorvachilikni rivojlantirish davlat qo‘mitasi tizimidagi Chorvachilik va parrandachilik ilmiy-tadqiqot instituti huzurida “Quyonchilik seleksiyasi va genetika markazi” tashkil etilishi ko‘zda tutilgan.
“2019-yil uchun respublikamizda asalarichilik sohasini strategik rivojlantirish yo‘nalishi belgilanib, bunda qishloq xo‘jaligi ekinlari va bog‘larni asalarilar bilan changlatish agrotexnikasi amaliyotda qo‘llanilmoqda. Samarqand viloyatining Jomboy va Bulung‘ur tumanlarida 1 ming 500 gektar bog‘lardagi mevali o‘simliklar 7 ming 500 dan ziyod asalari oilasi orqali changlatildi. Mazkur agrotexnikaning qo‘llanilishi natijasida faqatgina 90 gektar yerga ekilgan gilos bog‘ining har bir gektaridan kamida 10 tonnadan hosil olinishiga erishildi”, — deydi “O‘zbekiston asalarichilari” uyushmasi raisi Sherali Suyarqulov.
Ochiq muloqot tarzida davom etgan yig‘ilishda viloyatlardan kelib qatnashayotgan korxonalar rahbarlari, tadbirkorlar muammolari eshitildi. Ularni hal qilish bo‘yicha mutasaddilarga zarur topshiriqlar berildi.
Izoh (0)