O‘zbekistonda 27-iyul kuni “Sog‘lom oila – sog‘lom jamiyat” shiori ostida ommaviy tadbirlar o‘tkazildi. Bu haqda “Daryo”ga Sog‘liqni saqlash vazirligi matbuot xizmati ma’lum qildi.
Jumladan, Toshkentning Mirzo Ulug‘bek tumanida joylashgan “Central park” bog‘ida ham oilalar o‘rtasida ommaviy gimnastika va 5 kilometrga faol yurish mashqlari bilan bir qatorda, oilaviy musobaqalar uyushtirildi.
Qayd etish joizki, dunyo miqyosida qon bosimining oshishi yoshlarda ham uchramoqda, kishilar yurak-tomir, nafas olish organlari, diabet, saraton kasalliklari bilan ko‘proq og‘rimoqda. Ushbu yuqumli bo‘lmagan xastaliklar kelib chiqishining eng asosiy omillaridan biri sog‘lom turmush tarziga amal qilmaslikdir.
Yuqumli bo‘lmagan kasalliklar butun dunyoda o‘lim holatlarining asosiy sababchisi hisoblanadi. Jahon sog‘liqni saqlash tashkilotining ma’lumotlariga ko‘ra, 2016-yilda dunyo bo‘yicha 40 million o‘lim holati yuqumli bo‘lmagan kasalliklar tufayli yuz bergan bo‘lib, bu barcha o‘limlarning 70 foizini tashkil etadi.
O‘lim holatlarining anchagina qismi (dunyo bo‘yicha barcha o‘limning 27 foizi, yuqumli bo‘lmagan kasalliklarning esa 38 foizi) barvaqt, ya’ni 30 yoshdan 70 yoshgacha ro‘y bergan. Kelgusida dunyoda bu kasalliklardan vafot etganlar sonining yanada ko‘payishi kutilmoqda. Jahon sog‘liqni saqlash tashkiloti ma’lumotlariga ko‘ra, sog‘lom turmush tarziga rioya etilsa, 80 foiz yurak-qon tomir, qandli diabetning 2 turi va 40 foiz o‘sma kasalliklarining oldini olish mumkin ekan.
Texnologiyalarning rivojlanishi, turmush tarzining o‘zgarishi bilan odamlarning harakatlanishi va jismoniy mehnat bilan shug‘ullanishi kamaydi, chekadigan va spirtli ichimlik ichadigan insonlar ko‘paydi, tarkibida yog‘, qand va tuz miqdori yuqori bo‘lgan nosog‘lom oziq-ovqat mahsulotlari iste’moli ko‘paydi.
Shuningdek, aholining ovqatlanish odatlari o‘zgardi, jumladan, sabzavot va mevalarni yetarli iste’mol qilmaslik, tuzni me’yordan ortiq iste’mol qilish holatlari ham ko‘paydi. Bu esa o‘z navbatida, turmush tarzining o‘zgarishi, tana vaznining ortishi, semizlik, qonda xolesterin miqdorining oshishi va oqibatda, yuqumli bo‘lmagan kasalliklarning rivojlanishiga sabab bo‘lmoqda.
Sog‘liqni saqlash vazirligi tomonidan tashkil etilib, odamlar qiziqishiga sabab bo‘layotgan ommaviy salomatlik tadbirlari ham faol jismoniy harakatga chorlab, sog‘lom hayot tarzini targ‘ib etmoqda.
Izoh (0)