Аввалги ҳафта мамлакатимиздаги очиқ-ошкоралик жараёнларининг ноёб ҳодисаси билан солномага ёзилган бўлса, бу ҳафта ҳокимият вакилларининг фуқарога нисбатан шармандали хатти-ҳаракатлари билан тарихга муҳрланди. Дайжестимизни бошлаймиз.
20 июль куни Яккабоғда содир бўлган хунук воқеанинг видеоси ҳафта бошида интернетда тарқалди. Унда яккабоғлик тадбиркор бульдозер рулида ўтирган ҳоким ўринбосари устига бензин сочиб ёқиб юборгани акс этган. Маълум бўлишича, ҳокимлик вакиллари дабдурустдан тадбиркорнинг биносини бузишга келганда кўпчилик бўлиб қаршилик кўрсатишган. Натижада бульдозерчи бинони бузишдан бош тортган. Шунда ҳоким ўринбосари, Туймаев исмли киши рулга ўтириб ўзи бузмоқчи бўлганда сабр косаси тўлган тадбиркор Баҳриддин Исомов ушбу қалтис чорага қўл урган. Шундан сўнг Исомов ва унинг ўғлини ИИБ олиб кетган. Гарчи айби бўлмаса-да, унинг ўғлини ИИБ ходимлари калтаклаган.
Бино бузилган ҳудудда 30 га яқин дўконни ҳам шу ҳоким ўринбосари вайрон қилган бўлса-да, ҳеч бирига компенсация тўланмаган.
Юз берган ҳодиса оммавий ахборот воситаларида қаттиқ портлаш келтириб чиқарди. Ўнлаб нашрлар воқеани ёритди ва тадбиркорнинг ўзига хос «самосуд»ини оқламаган ҳолда, ҳоким ўринбосарининг тийиқсиз ҳаракатини қоралади. Қонунчилик палатаси депутатлари ҳокимларга билдирилган ишончнинг чегараси борлигини эслатди. Шундан сўнг вилоят ҳокими Зафар Рўзиев Яккабоққа келиб тадбиркорларнинг арзини тинглади. Жамоатчилик босими ва фаол арбоблар танқиди натижасида ҳоким ўринбосарини ёқиб юборган тадбиркорнинг дўкони бузилмайдиган бўлди, Яккабоғ ҳокими ва ўринбосари ишдан олинди, куйган ўринбосарга жиноят иши қўзғатилди.
* * *
22 июль куни Ахборот ва оммавий коммуникациялар агентлиги анжуманлар залида Иқтисодиёт ва саноат вазири Ботир Хўжаев иштирокида ўтган мулоқотда истеъмол саватчаси масаласи кўтарилди. Ботир Хўжаевнинг маълум қилишича, истеъмол саватчаси дунё иқтисодиётида амал қилиниши мажбурий кўрсаткич эмас. «Ўзбекистонда истеъмол саватчаси деган тушунчани жорий қилиш тахминан 2021 йилларга мўлжалланмоқда. Ҳозир ҳам истеъмол саватчаси ва яшаш учун энг кам миқдор тушунчалари тест тизимида синаб кўрилмоқда ва сўровномаларга кўра улар 650 минг ва 800 минг сўмни ташкил қилади», деди Ботир Хўжаев. Айтиш лозимки, мустақилликдан кейин истеъмол саватчаси атамаси иқтисодиётимизда қўлланмайди.
* * *
Ҳокимият ва аҳоли ўртасида кескин зиддият келтириб чиқарган яна бир воқеа Хоразм вилоятида юз берди. Урганч шаҳридаги «Ашхобод» маҳалласида яшовчи аҳолига Урганч туманидан ер ўрни ажратиб берилган, аммо компенсация пули тўланмаганди. Ҳокимият вакиллари бир қанча вақтдан бери ваъда бериб келган, ниҳоят сабр косаси тўлган минглаб уйсиз фуқаролар 26 июль куни кечаси Урганч-Ҳазорасп автомобиль йўлини тўсиб қўйган. Вилоят ҳокими келганда унинг палаткасини йиқитиб юборишган.
«Юксалиш» умуммиллий ҳаракати раиси Акмал Бурҳонов Ўзбекистонда аҳоли ва ҳокимият вакилларининг очиқ конфронтациясига сабаб бўлаётган кўчмас мулкларни оммавий бузиш жараёнларидан ташвишда эканини маълум қилди. Шунингдек, адлия вазири Русланбек Давлетов 27 июль кунидаги ҳайъат мажлисида «Одамларнинг уйини бузиб, кўчага чиқариб қўйиб, компенсация тўламаслик — ваҳшийлик!» деди.
Шавкат Мирзиёев аҳоли ва ҳокимлик ўртасидаги тушунмовчиликни ҳал қилиш учун бош вазирни Хоразмга юборди. Абдулла Арипов урганчликлар билан учрашди. Шундан сўнг автомобилларда пул келтирилиб, уйсизларга компенсация сифатида тарқатила бошланди. Бош вазир йиғилиш ўтказиб, Урганч шаҳри ҳокими ва прокурорига ҳайфсан берди. Бундан буён компенсация тўланмаган ва олдиндан огоҳлантирилмаган турар ва нотурар жойларни бузиш тўхтатиладиган бўлди.
* * *
Давлат тест маркази раҳбари Мажид Каримов «Kun.uz» билан суҳбатда «бу йилги август имтиҳонларида ўрнига кириш бўлмайди», деди. Маълумки, абитуриентлар орасида кенг тарқалган бу фирибгарлик айнан юз тузилиши ўхшаш талабгорларни алмаштириб қўйишга асосланган усулдир. Мажид Каримовнинг айтишича, эндиликда юзни таниш технологиялари қўлланади ва биометрик параметрлар аниқланади. Бироқ бу технология ҳам мутлақо камчиликсиз эмас. Агар бу жараёнда муаммоли вазият чиқса иккинчи идентификациялаш жараёни сифатида бармоқ излари солиштириб кўрилади. Шу тариқа «калла», «паровоз» деб аталувчи усулларга чек қўйилади.
* * *
Қашқадарёнинг Касби туманида ИИБ бошлиғи фермерларнинг шаънини таҳқирлайдиган ҳаракатга қўл урди. «Дарё» мухбири Отабек Қўлдошев бу ҳодисани ўрганди. ИИБ бошлиғи дала семинари ташкил қилган (аслида семинарни қишлоқ хўжалиги мутахассиси ташкил этади ва соҳа сирлари бўйича маълумот алмашилади). Семинарга 20 нафар ИИБ ходими келтирилган, шунингдек, «зековоз» машина ҳам олиб келинган. «Семинар»да 11 нафар кишининг қўлига кишан тақилган ва 50 даража иссиқда жазирама автобусга қамаб қўйилган.
«Дарё» мамлакатимизда қонун устунлиги ва ошкоралик қарор топгунича муаммоли вазиятларни ёритаверади. Касби воқеаси ечимини топгунича ОАВ диққат-эътиборида бўлади.
* * *
26 июль куни Ўзбекистон президенти Шавкат Мирзиёев халқ ҳаёти билан яқиндан танишиш ва аввал берилган топшириқлар ижросини кўздан кечириш учун Самарқанд вилоятига ташриф буюрди. Шавкат Мирзиёев Самарқанд халқаро аэропортининг ўзидаёқ мазкур аэропортни ривожлантиришга оид лойиҳа билан танишди. Ислом Каримов қабрини зиёрат қилди ва Самарқанд туманидаги «Агромир» мева-сабзавотларни қайта ишлаш корхонасида бўлди.
* * *
Тошкентда янги аэропорт терминали қурилади. Уни Швейцария компанияси бунёд этади. Соатига минг нафар йўловчига хизмат кўрсатиш имконига эга бўлади. Янги терминалнинг лойиҳаси Ҳумо қуши шаклида ишлаб чиқилган бўлиб, мутахассислар терминалнинг функсионал мақсади, яратиладиган шароит ва қулайликларга алоҳида эътибор қаратган.
Таъкидлаш лозимки, 2016 йилда янги «Тошкент-4» халқаро аэропорти Ҳумо қуши кўринишида бўлиши ҳақида хабар берилган ва иншоот макети намойиш қилинганди (видео). Бироқ ушбу макет Ҳумо қушидан кўра куракчани кўпроқ эслатарди. Бу ҳафта кўрсатилган янги чизмада эса Ҳумо қуши тасвири яққол кўринади.
«Дарё» янгиликларини кузатиб боринг. Ўзбекистон ва дунё хабарларидан энг биринчи хабардор бўлинг.
Изоҳ (0)