1992-yilda tug‘ilgan o‘g‘lining qo‘rs, badjahl ekanligidan kuygan ota-onaning dardi ichida edi. Akasini uylantirishganda o‘smir yigitcha – Ne’matning kelinchakka bo‘lgan qo‘polliklarini bo‘ydoqchilikka yo‘yishdi. Ammo bolani bir tekshirtirib, ruhiyatini davolataylik, deb hech o‘ylab ham ko‘rmadi. Bu haqda JIB Namangan viloyat sudi bo‘lim boshlig‘i Akramjon Oripov hikoya qilmoqda.
Sovuq munosabatlar, janjallardan bezigan ota-ona bir nafar farzandli bo‘lgan, ikkinchisiga homilador kelinni hali bitmagan uyga ko‘chirib qo‘ydi.
Ammo Ne’matga bu ham ma’qul kelmadi. U yana kelinoyisi bilan kunora borib urishib kelar, onamni xizmatini qilmading, deya to‘polon ko‘tarardi.
Kelin sho‘rlik nima qilishni bilmay qolgandi, ora-chora borib qaynonasinikida xizmat qilar, bu yoqda yangi uyning mehnatidan bo‘shamasdi.
O‘z kelinoyisiga bo‘lgan nafrat, g‘araz Ne’matning niyatini buzgandi. U kuzning sovuq bir kunida qo‘yniga pichoq yashirib, akasining uyiga yo‘l oldi.
Hovlida kir chayib o‘tirgan kelinoyisining qo‘lidan sudrab, uy ichiga tortarkan, Ne’mat g‘araz niyatini yashirmadi. “Seni o‘ldirmagunimcha tinchimayman!”
Qo‘rqib ketgan ayol tipirchilab qaynisining qo‘lidan chiqishga urinar, yalinib-yolvorardi. Ammo Ne’mat ojizligi, homiladorligini bila turib uning qorin sohasiga pichoqni sanchib olaveradi. Yordam chaqirishga uringan kelinoyisining og‘zini berkitib, shafqatsizlarcha bosib olib, ko‘krak, bo‘yin, hayoti uchun muhim sanalgan badanining boshqa joylariga o‘n besh marotaba pichoq urib, o‘ta og‘ir holatda jarohat yetkazib, uydan chiqib ketadi.
Bo‘lg‘usi ona, yoshgina ayol olgan tan jarohatlari, ichki-tashqi qon ketishi oqibatida voqea joyida vafot etadi.
Ruhiy kasalliklar klinik shifoxonasi xulosasiga ko‘ra, N. Zaripovda “vasvasaga tushish” kasalligi aniqlandi. U ijtimoiy xavfli qilmishni sodir etgan vaqtida o‘z harakatlarini idrok qila olmaydigan darajada ruhiy nosog‘lom bo‘lgan. Unga nisbatan kuzatuvi kuchaytirilgan ruhiy kasalliklar shifoxonasida intensiv nazoratda, majburiy tartibda davolanish tavsiya etildi.
Sud ish bo‘yicha mutaxassis va guvohlarning ko‘rsatmalari, ekspertiza xulosasi hamda ish bo‘yicha to‘plangan boshqa dalillarni o‘rganib chiqib, N. Zaripovning odam o‘ldirishda ifodalangan ijtimoiy xavfli qilmishni aqli noraso holatda sodir etgan, deb hisoblab, unga nisbatan jinoyat ishini tugatishni hamda tibbiy yo‘sindagi majburlov chorasi tayinlashni lozim topdi.
Izoh (0)