Aziza Umarova “O‘zbekiston havo yo‘llari”ning monopoliyasi haqida: Farzandlarimiz umri davomida dengizni ko‘rmay o‘tib ketadi

Smartgov Consulting byurosi ijrochi direktori, shuningdek, jamoatchilik arbobi Aziza Umarova o‘zining Facebook’dagi sahifasiga “Monopoliya: Va yana Havo yo‘llari” nomli post qoldirdi. Quyida ushbu post to‘lig‘icha keltirilgan.

Ta’tilda dam oluvchilarning asosiy qismi Turkiyaga boradi. Novokuznetskdagi oddiy ishchidan tortib, Chita—Chimkent—Cherkass yo‘nalishidagi biznes egalarigacha. Ataylab poytaxt nomlari va eksklyuziv haqida gapirmayapman. Antaliyadagi kurortlarning aksariyat qismi farzandlarini olib har yili bemalol dam olgani chiqib keta oladigan oddiy shaharlar aholisi bilan to‘la.

Bizda esa aksincha. Oddiy odamlar ta’tilda xorijga ucha olmaydi, chunki monopol-aviatashuvchi O‘zbekistonga raqobatchi qo‘ymaydi. Bizda charter reyslar, loukosterlar va mahalliy muqobil aviakompaniyalar yo‘q. (Xohlovchilar juda ko‘p). Buning o‘rniga har yoz mavsumida maftunkor “Havo yo‘llari”miz Antaliyaga amalda oshiradigan standart reysini “charter” deb atab, unga chiptalarni Istanbulgacha bo‘lgan reys qiymatida sotadi. Joylar esa doim aniq bir turfirma orqali bron qilinadi. Tanish-a?

“Havo yo‘llari”ning “charter”i bu — ochiqchasiga tafakkurni almashtirish. Chimkent, Moskva, Chelyabinskda “Havo yo‘llari”ning “charter”i narxiga (kamida 650 dollar) nafaqat dengizgacha chipta, balki bir haftaga all inclusive putyovkasini ham qo‘lga kiritasiz. Charter chiptalari standart 150—220 dollar turadi. Juda arzon. Shu sababli Turkiyada dam olish — Rossiya, Qozog‘iston, Ukraina aholisi uchun eng ommabop va hamyonbop dam olish maskani, bizda esa — hamon hashamat. O‘zbek turfirmalari o‘tgan safar o‘zlari charter reyslarni yo‘lga qo‘yishni taklif etgandi, biroq ular qat’iy rad javobini oldi. Faqat “O‘zbekiston havo yo‘llari” uchadi.

Andijon, Buxoro, Nukus, Qo‘qonda yashaydigan bolalarimizni Turkiyaning siyqasi chiqqan 3 yulduzli mehmonxonasiga olib borish ushalmas orzuligicha qolmoqda…

Aholining 95 foizi hayoti davomida dengizni ko‘rmay o‘tadi. Bunga kimdir o‘z hamyoni uchun ishlashni to‘xtatib, sog‘lom raqobatga ega aviatsiya bozorini qurish qiyinlik qilayotgani sabab bo‘lmoqda.