Samarqandning Urgut tumanida tibbiy tekshiruvlardan o‘z vaqtida o‘tkazilmagan, aniq tashxis qo‘yilib vaqtida kerakli jarrohlik amaliyoti o‘tkazilmagan homilador ayolning bolasi nobud bo‘ldi, deb xabar bermoqda Oliy Sud matbuot xizmati.
Ma’lum bo‘lishicha, Nodira (ism-familiyalar o‘zgartirilgan) belida kuchli og‘riq turgach, “tez yordam”da soat 09:00 da tug‘ruqxonaga olib kelinadi. Navbatchi shifokor ayolning qon bosimini o‘lchab, ahvoli yaxshi ekanligini aytadi va u tug‘ruq majmuasiga olib ketiladi. Qabul bo‘limida ham ayol obdon ko‘rikdan o‘tkaziladi so‘ng tug‘ruq zaliga olib chiqilgan.
U yerda homilador ayolning ahvoli og‘irlashgan, ammo zarur choralar ko‘rilmagan.O‘sha kuni birinchi navbatchi vrach sifatida tug‘ruq majmuasi akusher-ginekologi Shukur Nizomov ishlayotgan bo‘lgan.
Nodirani tug‘ruq zaliga chiqarishgach, ayolda og‘riq yanada kuchayadi. Soat 23:40 da tug‘ruq doyasi uni tekshirib ko‘rib, o‘z bilimi va tajribasi asosida maslahat bergan. Ammo Nodiraning ahvoli yengil tortmagach, doya N.Eshmamatova hamshira Muazzam opani yordamga chaqiradi. Muazzam opa Nodiraning yoniga kelib, qornining yuqori qismidan pastga qarata qo‘li bilan itargan. Bundan ham biron-bir natija bo‘lmaydi. Shundan so‘ng ular ayolga yurib ko‘rishni tavsiya qilgan.
Yura boshlagach, Nodiraning ahvoli yaxshi tomonga o‘nglanish o‘rniga oshqozonida qattiq og‘riq qo‘zg‘alib, yuragi siqilib, bezovtaligi kuchayadi. Egilib, emaklab qolgan kelinining ahvolini ko‘rgan O‘g‘iloy opa chidayolmaydi. Doya N.Eshmamatovadan tezda vrachni chaqirib kelishni so‘raydi.
Shukur Nizomov bemorni tekshirib, oshqozondagi og‘riq tug‘ruq bilan bog‘liqligi, tug‘ruqdan keyin o‘tib ketishini aytadi. Dard kelmagani uchun Nodira qanchalik harakat qilmasin, yengillasholmaydi. Soat 03:30 da tug‘ruq doyasi uchinchi navbatchi shifokor, akusher-ginekolog D. Fozilovani chaqirishiga to‘g‘ri keladi. Ammo D.Fozilova kelgandan so‘ng ham ayol tabiiy yo‘l bilan farzandini dunyoga keltirolmaydi.
Bemorni qabul qilib, javobgarlik zimmasida turgan Shukur Nizomov esa, tug‘ruq zalida ertalab soat beshlarda paydo bo‘ladi. U azob chekayotgan ayolning ahvolini ko‘rib, “Harakat qil, bolangni qiynayapsan” deydi, xolos. Bemorning ahvoli esa, tobora og‘irlashayotgandi. Shundan so‘ng UTT shifokorini chaqirishga majbur bo‘ladi. Mutaxassis shifokor homila yurak urishi juda sust ekanini aytadi.
Sudda ish mazmunan ko‘rish jarayonida jabrlanuvchi, guvohlar hamda ekspertiza byurosi mutaxassislarining ko‘rsatmalari eshitildi, ekspertiza xulosalari chuqur o‘rganildi.
Guvoh, akusher-ginekolog D.Fozilovaning sudda ko‘rsatma berishicha, shifokor Sh.Nizomov soat olti-yu yigirmalarda unga qo‘ng‘iroq qilgan va N.Nosirovani operatsiya qilish lozimligini aytgan. Kesarcha kesish jarrohlik amaliyoti amalga oshirilgan. Ammo chaqaloqda antinotal o‘lim kuzatilgan.
Sudda so‘ralgan guvoh Sh.Nazarqulovaning ko‘rsatmasiga qaraganda, u tug‘ruq majmuasi neontolog vrachi sifatida kesarcha kesish operatsiyasida ishtirok etgan. Operatsiyadan oldin shaxsan o‘zi tekshirganda homilaning yurak urishi eshitilmagan.
Samarqand viloyat sud-tibbiy ekspertiza byurosining Ј-37-sonli komissiyaviy ekspertiza xulosasida tuman tug‘ruq majmuasi akusher-ginekologi Sh.Nizomov tomonidan N.Nosirovaga amaldagi milliy standartga mos ravishda tekshiruvlar to‘liq hajmda, o‘z vaqtida o‘tkazilmagani, aniq tashxis qo‘yilmagani chaqaloqning vafot etishiga sabab bo‘lgani qayd etilgan.
Sudda viloyat sud-tibbiy ekspertiza byurosi “Qayta, komission va kompleks ekspertizalar” bo‘limi mudiri lavozimida ishlovchi guvoh E.Abdumutalovning ham ko‘rsatmasi eshitildi. Uning aytishicha, N.Nosirovaga to‘g‘ri tashxis qo‘yilmagan, zarur tibbiy tekshiruvlar to‘liq o‘tkazilmagan, laboratoriya va UTT tekshiruvlari vaqtida bajarilmagan, terapevt ko‘rigi o‘tkazilmagan.
“Me’yorida joylashgan yo‘ldoshning qisman o‘tkir ko‘chishi” tashxisi ertalab soat 6:20 da qo‘yilgan. Shu zahotiyoq shoshilinch ravishda jarrohlik amaliyoti o‘tkazilishi lozim bo‘lsa ham, lekin bu amaliyot oradan qirq daqiqa o‘tib, bajarilgan. Chaqaloqqa shoshilinch reanimatsion yordam ko‘rsatilmagan.
Sudda jabrlanuvchi N.Nosirova esa bir nafar qizi borligi, tug‘ilajak farzandi esa, kutganidek o‘g‘il bo‘lgani, endi jarrohlik amaliyotidan so‘ng farzand ko‘rolmasligini aytgan.
Sud sudlanuvchi Sh.Nizomovni Jinoyat kodeksining 116-moddasi 3-qismi bilan aybdor deb topdi. Unga nisbatan Jinoyat kodeksining 45-moddasini qo‘llab, uch yil tibbiyot muassasalarida akusher-ginekolog shifokor vazifasida, shuningdek, mansabdor, moddiy javobgar shaxs lavozimlarida ishlash huquqidan mahrum etib, ikki yil olti oy muddatga ozodlikdan mahrum qilish to‘g‘risida hukm chiqardi.
Sh.Nizomovga nisbatan qo‘llanilgan “munosib xulq-atvorda bo‘lish haqidagi tilxat” ehtiyot chorasi bekor qilinib, u sud zalida qamoqqa olingan.
Izoh (0)