Qashqadaryo viloyat IIB huzuridagi Tergov boshqarmasida O‘zbekistondagi dastlabki innovatsion virtual tergov poligoni tashkil etildi. Bu haqda “Daryo”ga viloyat IIB matbuot xizmati xabar bermoqda.
Prezident Shavkat Mirziyoyev tomonidan huquq tartibot va jamoatchilik vakillari ishtirokida joriy yilning 10-yanvar kuni o‘tkazilgan videoselektorda ichki ishlar organlari xodimlarining kasbiy mahoratini muntazam oshirib borish masalasiga alohida e’tibor qaratilib, kadrlar tayyorlash tizimi eng yangi yondashuvlarga, innovatsiyalarga asoslanishi, ular shiddat bilan o‘zgarayotgan zamon va shart-sharoitlarga mos bo‘lishi zarurligi haqida tegishli topshiriq va vazifalarni belgilab bergan edi. Mazkur topshiriq ijrosidan kelib chiqib, O‘zbekiston Respublikasi Ichki ishlar vaziri tomonidan 2019-yil ichki ishlar idoralari uchun “Innovatsiya yili” deb e’lon qilindi.
— Virtual tergov poligoni barpo etilishida viloyat IIB xodimlari Rossiyaning “Fundamentalniye sistemi analiza” kompaniyasi mutaxassislari bilan hamkorlikda ish olib bordi, — deyiladi IIB matbuot xizmati xabarnomasida. — Shuningdek, sertifikatlangan hodisa joyini virtual ko‘zdan kechirish dasturiy ta’minotini yaratish hamda ushbu dasturni zamonaviy VR Oculus uskunalariga o‘rnatildi.
Innovatsion virtual tergov poligonida o‘rnatilgan dasturiy ta’minot istalgan hodisa joyining modelini yaratish imkonoyatiga ega bo‘lib, tergovchi yoki surishtiruvchiga virtual tarzda hodisa sodir bo‘lgan joyni ilmiy va nazariy asoslangan holda ko‘zdan kechirgan holda amaliyotda yo‘l qo‘yishi mumkin bo‘lgan xatolarni bartaraf etish ustida ishlash imkoniyatini beradi. Texnologiyalar imkoniyatidan foydalanib, o‘rganuvchi mashg‘ulot xonasida virtual holatda hodisa sodir bo‘lgan joyni real vaqt va sharoitda ko‘zdan kechiradi. Uning harakatlari kompyuterda tahlil qilib boriladi va mashg‘ulot ishtirokchisi o‘z xatosini to‘g‘irlamaguniga qadar tizim tomonidan keyingi bosqichga o‘tish imkoniyatini bermaydi.
Shuningdek, o‘rganuvchi mazkur dastur doirasida o‘z harakatlarini elektron tarzda bayonnomada rasmiylashtirish, mashg‘ulot doirasida tuzilgan test savollariga javob berish hamda mavzuga doir adabiyotlar bilan tanishish imkoniyatiga ega.
Innovatsion dasturning yana bir afzallik jihati shundaki, u nafaqat tergov, balki jinoyat qidiruv va ekspert-kriminalistika xodimlarining ham malakasini oshirish, amaliy ko‘nikmalarini boyitish uchun xizmat qilishi mumkin.
Izoh (0)