Қашқадарё вилоят ИИБ ҳузуридаги Тергов бошқармасида Ўзбекистондаги дастлабки инновацион виртуал тергов полигони ташкил этилди. Бу ҳақда «Дарё»га вилоят ИИБ матбуот хизмати хабар бермоқда.
Президент Шавкат Мирзиёев томонидан ҳуқуқ тартибот ва жамоатчилик вакиллари иштирокида жорий йилнинг 10 январь куни ўтказилган видеоселекторда ички ишлар органлари ходимларининг касбий маҳоратини мунтазам ошириб бориш масаласига алоҳида эътибор қаратилиб, кадрлар тайёрлаш тизими энг янги ёндашувларга, инновацияларга асосланиши, улар шиддат билан ўзгараётган замон ва шарт-шароитларга мос бўлиши зарурлиги ҳақида тегишли топшириқ ва вазифаларни белгилаб берган эди. Мазкур топшириқ ижросидан келиб чиқиб, Ўзбекистон Республикаси Ички ишлар вазири томонидан 2019 йил ички ишлар идоралари учун «Инновация йили» деб эълон қилинди.
— Виртуал тергов полигони барпо этилишида вилоят ИИБ ходимлари Россиянинг «Фундаменталние системи анализа» компанияси мутахассислари билан ҳамкорликда иш олиб борди, — дейилади ИИБ матбуот хизмати хабарномасида. — Шунингдек, сертификатланган ҳодиса жойини виртуал кўздан кечириш дастурий таъминотини яратиш ҳамда ушбу дастурни замонавий VR Oculus ускуналарига ўрнатилди.
Инновацион виртуал тергов полигонида ўрнатилган дастурий таъминот исталган ҳодиса жойининг моделини яратиш имконоятига эга бўлиб, терговчи ёки суриштирувчига виртуал тарзда ҳодиса содир бўлган жойни илмий ва назарий асосланган ҳолда кўздан кечирган ҳолда амалиётда йўл қўйиши мумкин бўлган хатоларни бартараф этиш устида ишлаш имкониятини беради. Технологиялар имкониятидан фойдаланиб, ўрганувчи машғулот хонасида виртуал ҳолатда ҳодиса содир бўлган жойни реал вақт ва шароитда кўздан кечиради. Унинг ҳаракатлари компьютерда таҳлил қилиб борилади ва машғулот иштирокчиси ўз хатосини тўғирламагунига қадар тизим томонидан кейинги босқичга ўтиш имкониятини бермайди.
Шунингдек, ўрганувчи мазкур дастур доирасида ўз ҳаракатларини электрон тарзда баённомада расмийлаштириш, машғулот доирасида тузилган тест саволларига жавоб бериш ҳамда мавзуга доир адабиётлар билан танишиш имкониятига эга.
Инновацион дастурнинг яна бир афзаллик жиҳати шундаки, у нафақат тергов, балки жиноят қидирув ва эксперт-криминалистика ходимларининг ҳам малакасини ошириш, амалий кўникмаларини бойитиш учун хизмат қилиши мумкин.
Изоҳ (0)