6-iyul, shanba kuni Andijon viloyati Xo‘jaobod tumanidagi Xidirsha massivida 4 mingdan ortiq avtomobilni qamrab olish quvvatiga ega yangi avtomobil bozori majmuasi foydalanishga topshirildi. Bu haqda “Daryo” muxbiri xabar bermoqda.
Viloyat bozorlari va savdo komplekslari uyushmasi raisi Hotamjon Mamarasulovning aytishicha, majmua yer maydoni va quvvati jihatidan olganda O‘zbekistondagi eng katta avtomobil bozori hisoblanadi.
Uning umumiy yer maydoni 8 gektarni, shundan 6 gektari avtomobil sotish maydonini tashkil etadi. Bozor bir vaqtning o‘zida keng va qulay sharoitda turli rusumdagi 4 mingdan ortiq avtomobilni qamrab olish quvvatiga ega.
Bundan tashqari, ehtiyot qismlarni sotishga ixtisoslashgan 150 ta zamonaviy savdo do‘konlari barpo etilgan. Olti oydan ortiq davom etgan qurilish ishlari uchun mahalliy budjet hisobidan 20 milliard so‘mdan ortiq mablag‘ sarflangan.
Ushbu bozor hududiga kirgan har bir avtomobil elektron kamera orqali hisobga olinadi. Bunda mashina qancha vaqt ichida sotilgani hamda qancha muddat turgani, narxlari tablolarda ko‘rsatib boriladi.
Tadbirda ishtirok etgan viloyat hokimi Shuhratbek Abdurahmonovning qayd etishicha, eski avtomobil bozori Andijon shahrining Bog‘ishamol dahasida joylashgan edi.
Umumiy maydoni 3 gektarni tashkil etib, shundan 2 gektarida 400 ga yaqin savdo do‘konlari xizmat ko‘rsatar, avtomobil sotish maydoni esa atigi 80 sotixni tashkil etardi. Bu esa, o‘z navbatida, 600 ta transport vositalari savdosini tashkil etish imkonini bergan.
Mingdan ortiq transport vositalari esa ko‘cha savdosiga chiqib, sun’iy tirbandliklarni keltirib chiqargan, shuningdek, katta halqa yo‘lidagi yo‘lovchilarga, ayniqsa, hududda yashovchi aholiga noqulayliklarni tug‘dirgan.
Viloyat rahbarining aytishicha, eski bozordagi ko‘cha savdosi — bozor tushumiga ham o‘z ta’sirini o‘tkazib, savdo kunida 14 million so‘m, bir yilda esa 1,5 milliard so‘mdan ortiq tushumni tushishiga to‘sqinlik qilgan.
Izoh (0)