Buxoroda Xalqaro olimpiya kuni munosabati bilan “Tokio sari yo‘l” shiori ostida ommaviy yurish marafoni o‘tkazildi. 10 mingdan ortiq keng jamoatchilik vakillari “Sitora” bolalar bog‘idan “Ark” qo‘rg‘onigacha bo‘lgan masofani bosib o‘tdi. Bu haqda marafonda ishtirok etgan “Daryo” muxbiri xabar bermoqda.
Mashhur sportchilar, estrada yulduzlari, teatr aktyorlari, havaskor sporchilar, turli idora-tashkilot, ta’lim muassasalarining rahbar va vakillaridan iborat ishtirokchilar avtotransportlarsiz harakatlanish inson salomatligi uchun muhim ekanligini o‘z xursandchiliklari orqali ifodaladi.
— Men uchinchi yildirki Xalqaro Olimpiada kuni munosabati bilan o‘tkaziladigan barcha sport tadbirlarida ishtirok etaman. U xoh yengil atletika, xoh yugurish, yurish va xoh velomarafon bo‘lsin, hech birini qoldirmayman. Bunday tadbirlar, musobaqalar men uchun juda yoqimli. Seni yoshlar qo‘llab-quvvatlab turganini his qilib turish yanayam ajoyib. Mana shunday ommaviy tadbirlarda ishtirok etish ham kayfiyatni ko‘taradi, ham insonning faolligini oshiradi. Shaxsan o‘zim sport mashg‘ulotlari orqali turli xastaliklardan forig‘ bo‘ldim, — dedi marafon ishtirokchisi 69 yoshli Karima Husaynova.
“Ark” qo‘rg‘oni maydoniga to‘plangan marafon ishtirokchilari ommaviy tarzda gimnastika mashg‘ulotlarini ham bajardi. Maydon bo‘ylab olimpiada belgisini ifodalovchi 5 xil rangdagi futbolkalarda olimpiada halqasi shakllantirildi. Ularning orqa fonida esa xalqaro sport musobaqalarida g‘olib bo‘lgan sportchilar saf tortdi. Sportning badiiy gimnastika, boks, taekvondo turlari bilan shug‘ullanadigan sportchilar ma’lum shakl asosida harakatlandi.
Kechki payt “Ko‘hna va boqiy Buxoro” majmuasidagi amfiteatrda “Olimpiya kuni”ga bag‘ishlangan gala-konsert bo‘lib o‘tdi.
Izoh (0)