6 июль, шанба куни Андижон вилояти Хўжаобод туманидаги Хидирша массивида 4 мингдан ортиқ автомобилни қамраб олиш қувватига эга янги автомобиль бозори мажмуаси фойдаланишга топширилди. Бу ҳақда «Дарё» мухбири хабар бермоқда.
Вилоят бозорлари ва савдо комплекслари уюшмаси раиси Ҳотамжон Мамарасуловнинг айтишича, мажмуа ер майдони ва қуввати жиҳатидан олганда Ўзбекистондаги энг катта автомобиль бозори ҳисобланади.
Унинг умумий ер майдони 8 гектарни, шундан 6 гектари автомобиль сотиш майдонини ташкил этади. Бозор бир вақтнинг ўзида кенг ва қулай шароитда турли русумдаги 4 мингдан ортиқ автомобилни қамраб олиш қувватига эга.
Бундан ташқари, эҳтиёт қисмларни сотишга ихтисослашган 150 та замонавий савдо дўконлари барпо этилган. Олти ойдан ортиқ давом этган қурилиш ишлари учун маҳаллий бюджет ҳисобидан 20 миллиард сўмдан ортиқ маблағ сарфланган.
Ушбу бозор ҳудудига кирган ҳар бир автомобиль электрон камера орқали ҳисобга олинади. Бунда машина қанча вақт ичида сотилгани ҳамда қанча муддат тургани, нархлари таблоларда кўрсатиб борилади.
Тадбирда иштирок этган вилоят ҳокими Шуҳратбек Абдураҳмоновнинг қайд этишича, эски автомобиль бозори Андижон шаҳрининг Боғишамол даҳасида жойлашган эди.
Умумий майдони 3 гектарни ташкил этиб, шундан 2 гектарида 400 га яқин савдо дўконлари хизмат кўрсатар, автомобиль сотиш майдони эса атиги 80 сотихни ташкил этарди. Бу эса, ўз навбатида, 600 та транспорт воситалари савдосини ташкил этиш имконини берган.
Мингдан ортиқ транспорт воситалари эса кўча савдосига чиқиб, сунъий тирбандликларни келтириб чиқарган, шунингдек, катта ҳалқа йўлидаги йўловчиларга, айниқса, ҳудудда яшовчи аҳолига ноқулайликларни туғдирган.
Вилоят раҳбарининг айтишича, эски бозордаги кўча савдоси — бозор тушумига ҳам ўз таъсирини ўтказиб, савдо кунида 14 миллион сўм, бир йилда эса 1,5 миллиард сўмдан ортиқ тушумни тушишига тўсқинлик қилган.
Изоҳ (0)