Internetda Qozog‘istonning Aris shahridagi harbiy qismda portlashlar chog‘ida olgan xayrlashuv videosi tarqalgan askar 27 yoshli Isatay Alibayevga noma’lum biznesmen yirik miqdorda pul sovg‘a qildi, deb yozmoqda Tengrinews.
Leytenant bu pullarni shahar aholisiga berishga qaror qildi. Uning so‘zlariga ko‘ra, saxiy tadbirkorni ko‘chada uchratib qolgan. Erkakning o‘zi ofitserga yaniqlashib, fuqarolarni evakuatsiya qilishdagi yordami uchun minnatdorchilik bildirib, bir dasta 10 ming tengelik kupyuralarni bergan.
Isatay Alibayev bunday kutilmagan sovg‘ani olishdan bosh tortgan, ammo biznesmen o‘z qarorida qat’iy turib, uning harakatlaridan faxrlanishini aytgan va bir dasta pulni uning cho‘ntagiga solgan.
“Bu yirik miqdordagi pullar edi, sanab ko‘rmadim. Taxminan 100 ming tenge balki undan ko‘pdir. Pullarni olishni xohlamagandim, lekin uni menga berib ‘Barakalla! Sen bilan faxrlanaman’, dedi. So‘ng meni qattiq quchoqladi. Aytmoqchimanki, men shunchaki o‘z harbiy burchimni bajardim xolos. O‘rnimda boshqa odam bo‘lganida ham shunday yo‘l tutgan bo‘lar edi”, — deb aytgan.
Eslatib o‘tamiz, 24-iyun kuni ertalab taxminan soat 09:20 da Qozog‘istonning Aris shahrida joylashgan harbiy qismda yong‘in yuz berib, keyinchalik o‘q-dorilar portlashi sodir bo‘lgan edi. Oqibatda 31 kishi shifoxonaga jo‘natilgan, 2 kishi halok bo‘lgan. Portlashlar chog‘ida askarlardan biri ota-onasi uchun vidolashuv videosini yozib, “Agar men tirik qolmasam… ota-onam, sizlarni yaxshi ko‘raman”, — deya ko‘ngli buzilib, ko‘ziga yosh olgandi.
Izoh (0)