Интернетда Қозоғистоннинг Арис шаҳридаги ҳарбий қисмда портлашлар чоғида олган хайрлашув видеоси тарқалган аскар 27 ёшли Исатай Алибаевга номаълум бизнесмен йирик миқдорда пул совға қилди, деб ёзмоқда Tengrinews.
Лейтенант бу пулларни шаҳар аҳолисига беришга қарор қилди. Унинг сўзларига кўра, сахий тадбиркорни кўчада учратиб қолган. Эркакнинг ўзи офицерга яниқлашиб, фуқароларни эвакуация қилишдаги ёрдами учун миннатдорчилик билдириб, бир даста 10 минг тенгелик купюраларни берган.
Исатай Алибаев бундай кутилмаган совғани олишдан бош тортган, аммо бизнесмен ўз қарорида қатъий туриб, унинг ҳаракатларидан фахрланишини айтган ва бир даста пулни унинг чўнтагига солган.
«Бу йирик миқдордаги пуллар эди, санаб кўрмадим. Тахминан 100 минг тенге балки ундан кўпдир. Пулларни олишни хоҳламагандим, лекин уни менга бериб ‘Баракалла! Сен билан фахрланаман’, деди. Сўнг мени қаттиқ қучоқлади. Айтмоқчиманки, мен шунчаки ўз ҳарбий бурчимни бажардим холос. Ўрнимда бошқа одам бўлганида ҳам шундай йўл тутган бўлар эди», — деб айтган.
Эслатиб ўтамиз, 24 июнь куни эрталаб тахминан соат 09:20 да Қозоғистоннинг Арис шаҳрида жойлашган ҳарбий қисмда ёнғин юз бериб, кейинчалик ўқ-дорилар портлаши содир бўлган эди. Оқибатда 31 киши шифохонага жўнатилган, 2 киши ҳалок бўлган. Портлашлар чоғида аскарлардан бири ота-онаси учун видолашув видеосини ёзиб, «Агар мен тирик қолмасам… ота-онам, сизларни яхши кўраман», — дея кўнгли бузилиб, кўзига ёш олганди.
Изоҳ (0)