Davlat test markazi Telegramda rasmiy kanal (@rasmiydtm) ochdi. DTMning rasmiy kanali qabulga oid ma’lumotlarni bera boshladi, deb yozadi Xushnudbek Xudayberdiyev o‘z Telegram-kanalida.
Unda turli yangi ma’lumotlar e’lon qilinmoqda.
Jumladan, uchta yo‘nalishni tanlayotganda nafaqat fanlar ketma-ketligi mos bo‘lishi kerak, balki ta’lim tili ham bir xil bo‘lishi shart. Ya’ni ikkitasini o‘zbek tiliga, 1 tasini rus tili (yevro)ga topshirib bo‘lmaydi. Yoki uchalasi ham o‘zbek, yoki uchalasi ham rus tili bo‘lishi kerak.
Bundan tashqari, Jahon iqtisodiyoti va diplomatiya universiteti hamda Toshkent temir yo‘l muhandislik institutiga hujjat topshirish uchun faqat o‘sha OTMlarning o‘ziga (ya’ni Toshkentga) borish kerak. Qolgan OTMlar uchun esa Toshkentga (OTMning o‘ziga) kelish shart emas. TDYuU uchun istalgan tumandagi DXMga borish kerak, qolgan OTMlar uchun istalgan OTMga borish kifoya.
Nima uchun JIDU va ToshTYMIga albatta o‘ziga borish kerak?
Birinchidan, JIDUning qabul tartibi boshqalardan farq qiladi. Ularda qabul 5-iyulgacha (15-iyul emas) davom etadi, shuningdek, testgacha universitetning o‘zida birlamchi saralash bosqichi bo‘ladi.
Ikkinchidan, ToshTYMIda talabaning salomatiligi ham muhim, shuning uchun abituriyentlar hujjat topshirishda tibbiy komissiya nazoratidan ham o‘tadi.
Izoh (0)