18-iyun kuni Havo hujumidan mudofaa va Harbiy havo kuchlari qo‘shinlariga qarashli Qashqardaryo viloyatida joylashgan harbiy qism tashkil etilganligining 70 yilligi munosabati bilan tantanali marosim bo‘lib o‘tdi. Bu haqda Mudofaa vazirligi matbuot xizmati xabar berdi.
Marosimda Havo hujumidan mudofaa va Harbiy havo kuchlari qo‘shinlari qo‘mondoni general-mayor Ahmad Burhonov, Janubi-g‘arbiy maxsus harbiy okrug qo‘shinlari qo‘mondoni polkovnik Zaynobiddin Iminov, Qashqadaryo viloyati hokimi Zafar Ro‘ziyev, mazkur harbiy qismning sobiq harbiy xizmatchisi Rossiya Federatsiyasidan kelgan mehmon, zahiradagi polkovnik Valeriy Goldishev, zahiradagi polkovnik Aleksandr Xarlamov boshchiligidagi faxriylar, harbiy xizmatchilar va ularning oila a’zolari hamda ommaviy axborot vositalari xodimlari ishtirok etdi.
Tantanali marosimda so‘z olganlar mazkur harbiy qism yetishtirib bergan uchuvchilarning Qurolli Kuchlar rivojiga qo‘shgan beqiyos hissasi, ular yaratgan maktab, ustoz-shogirdlik an’analarining bugungi kunda yangi bosqichga ko‘tarilganini, qolaversa O‘zbekiston Prezidenti tomonidan harbiy uchuvchilarga ko‘rsatilgan yuksak e’tiborning soha vakillari faoliyatida muhim ahamiyat kasb etayotganini ta’kidladi.
Shundan so‘ng, O‘zbekiston armiyasining Mig-29, Su-25 kabi qiruvchi samolyotlarining samodagi “raqsi” barchani hayratlantirdi.
“Harbiy xizmatchilarning oila a’zolarini harbiy qism bilan tanishtirish maqsadida marosim dasturidan o‘rin olgan Qashqadaryo qadriyatlarini namoyish etuvchi baddiy ko‘rgazmalar hamda ‘ochiq eshiklar kuni’, ayniqsa, bolajonlarda unutilmas taassurot qoldirib, ular qalbida harbiy-vatanparvarlik hissini yanada jo‘sh urdirdi; ko‘ngillarida kelgusida harbiy uchuvchi bo‘lish maqsadini paydo etdi.
Shu kuni ochiq osmon ostida tashkil etilgan qiruvchi samolyotlar maketlari hamda harbiy uchuvchi haykali siymosi aks etgan muzeyning ochilish marosimi yetmish harbiy qismning yetmish yillik to‘yiga to‘yona bo‘ldi.
Tadbir davomida Qurolli Kuchlar Markaziy ashula va raqs ansambli hamda mahallik xushovoz xonandalar tomonidan ijro etilgan kuy-qo‘shiqlar barchaga xushnudlik ulashdi”, — deyiladi xabarda.
Izoh (0)