O‘zbekistonda ilk bor chet tillarni o‘qitish va amaliy tilshunoslik sohasi dolzarb muammolar bo‘yicha xalqaro FLTAL anjumani bo‘lib o‘tdi. Bu haqda “Daryo” muxbiri xabar berdi. Anjuman Janubiy Koreya Xalqaro tadqiqotlar universiteti, Gubkin nomidagi Rossiya Neft va gaz davlat universitetining Toshkent filiali va Toshkent shahridagi Eriell Prof Education ta’lim muassasasi tomonidan tashkil etildi.
Toshkent shahri mezbonlik qilgan FLTAL (Foreign Language Teaching and Applied Linguistics — Chet tillarni o‘qitish va amaliy tilshunoslik assotsiatsiyasi) anjumani bundan avval Bosniya va Gersegovina poytaxti Sarayevo, Xorvatiya poytaxti Zagreb, Qozog‘istonning Ostona va Olmaota shaharlarida o‘tkazilgan.
“Ko‘ptilli shaxsning ijodiy istiqbollari: ko‘ptillilik omilining chet tilini o‘rganish jarayoniga ta’siri” anjumaniga “Buyuk kelajak” kengashi eksperti, filologiya fanlari doktori, Pusan milliy universiteti professori Azamat Akbarov moderatorlik qildi.
“Bugungi kunda O‘zbekistonning xalqaro aloqalari, uning jahon iqtisodiyoti, ilmiy, madaniy va tijorat-biznes hamjamiyati bilan integratsiyasi, chet el investitsiyalarini jalb qilish va o‘zlashtirish jarayonlari jadal sur’atlarda rivojlanib borayotgan bir vaqtda zamonaviy talablarga javob bera oladigan yuqori malakali mutaxassislarni tayyorlash nuqtai nazaridan qaralganda chet tillarni bilish alohida ahamiyat kasb etadi”, — deydi professor Akbarov.
Uning qo‘shimcha qilishicha, Prezident Shavkat Mirziyoyev O‘zbekistonda yashaydigan barcha millatlar va xalqlarning ona tillarini saqlab qolish va rivojlantirishga alohida e’tibor qaratmoqda. Bu sohada Prezident farmonlari va qarorlarini ijro etish maqsadida respublikada keng qamrovli mavzularga bag‘ishlangan ilmiy-amaliy tadbirlar o‘tkazilmoqda.
Foto: “Daryo”
FLTAL—2019 anjumani ishida 35 mamlakatdan til va madaniyatlararo ta’lim va tilshunoslik sohasida ekspert bo‘lgan jami 340 yetakchi mutaxassislar, talabalar qatnashdi. Jumladan, Avstriya, Belarus, Boliviya, Buyuk Britaniya, Germaniya, Irlandiya, Ispaniya, Italiya, Kanada, Xitoy, Yangi Zelandiya, Rossiya, Ukraina, Fransiya, Ekvadordan tilshunos olimlar ishtirok etdi.
Anjumanda amaliy tilshunoslikning dolzarb muammolari, professional yo‘naltirilgan tarjima masalalari, madaniyatlararo professional muloqot va tilga tegishlilik kabi mavzularda muhokamalar bo‘lib o‘tdi.
Izoh (0)