Ўзбекистонда илк бор чет тилларни ўқитиш ва амалий тилшунослик соҳаси долзарб муаммолар бўйича халқаро FLTAL анжумани бўлиб ўтди. Бу ҳақда «Дарё» мухбири хабар берди. Анжуман Жанубий Корея Халқаро тадқиқотлар университети, Губкин номидаги Россия Нефть ва газ давлат университетининг Тошкент филиали ва Тошкент шаҳридаги Eriell Prof Education таълим муассасаси томонидан ташкил этилди.
Тошкент шаҳри мезбонлик қилган FLTAL (Foreign Language Teaching and Applied Linguistics — Чет тилларни ўқитиш ва амалий тилшунослик ассоциацияси) анжумани бундан аввал Босния ва Герцеговина пойтахти Сараево, Хорватия пойтахти Загреб, Қозоғистоннинг Остона ва Олмаота шаҳарларида ўтказилган.
«Кўптилли шахснинг ижодий истиқболлари: кўптиллилик омилининг чет тилини ўрганиш жараёнига таъсири» анжуманига «Буюк келажак» кенгаши эксперти, филология фанлари доктори, Пусан миллий университети профессори Азамат Акбаров модераторлик қилди.
«Бугунги кунда Ўзбекистоннинг халқаро алоқалари, унинг жаҳон иқтисодиёти, илмий, маданий ва тижорат-бизнес ҳамжамияти билан интеграцияси, чет эл инвестицияларини жалб қилиш ва ўзлаштириш жараёнлари жадал суръатларда ривожланиб бораётган бир вақтда замонавий талабларга жавоб бера оладиган юқори малакали мутахассисларни тайёрлаш нуқтаи назаридан қаралганда чет тилларни билиш алоҳида аҳамият касб этади», — дейди профессор Акбаров.
Унинг қўшимча қилишича, Президент Шавкат Мирзиёев Ўзбекистонда яшайдиган барча миллатлар ва халқларнинг она тилларини сақлаб қолиш ва ривожлантиришга алоҳида эътибор қаратмоқда. Бу соҳада Президент фармонлари ва қарорларини ижро этиш мақсадида республикада кенг қамровли мавзуларга бағишланган илмий-амалий тадбирлар ўтказилмоқда.
Фото: «Дарё»
FLTAL—2019 анжумани ишида 35 мамлакатдан тил ва маданиятлараро таълим ва тилшунослик соҳасида эксперт бўлган жами 340 етакчи мутахассислар, талабалар қатнашди. Жумладан, Австрия, Беларусь, Боливия, Буюк Британия, Германия, Ирландия, Испания, Италия, Канада, Хитой, Янги Зеландия, Россия, Украина, Франция, Эквадордан тилшунос олимлар иштирок этди.
Анжуманда амалий тилшуносликнинг долзарб муаммолари, профессионал йўналтирилган таржима масалалари, маданиятлараро профессионал мулоқот ва тилга тегишлилик каби мавзуларда муҳокамалар бўлиб ўтди.
Изоҳ (0)