O‘zbekiston va Qirg‘iziston o‘rtasida yozgi mavsumda “Toshkent— Ribachye (Baliqchi)” yo‘lovchi poyezdi qatnovlari yo‘lga qo‘yiladi. Bu haqda “Kirgiz temir jo‘lu” kompaniyasi matbuot xizmati ma’lum qildi.
Qatnovlar 2019-yilning 6-iyunidan boshlanadi va haftasiga bir marta — payshanba kuni amalga oshiriladi.
Poyezd Toshkent vaqti bilan 20:50 da yo‘lga chiqib, Chimkent, Taroz shaharlari orqali juma kuni soat 19:03 da Bishkekka yetib boradi va 23:19 da Ribachyega keladi.
Ribachyedan esa poyezd 8-iyun kuni soat 04:59 da yo‘lga chiqib, 9-iyun, yakshanba kuni soat 05:00 da Toshkentga qaytib keladi.
Chiptalar narxi (Bishkekdan Toshkentga):
- platskart vagonda — 1946 qirg‘iz so‘mi (2-may holatiga ko‘ra — taxminan 235 ming o‘zbek so‘mi)dan;
- kupe vagonda — 2461 qirg‘iz so‘mi (taxminan 298 ming o‘zbek so‘mi)dan;
- lyuks vagonda — 4602 qirg‘iz so‘mi (taxminan 556 ming o‘zbek so‘mi)dan boshlab.
Eslatib o‘tamiz, 2017-yilning fevral oyida “O‘zbekiston temir yo‘llari” va “Kirgiz temir jo‘lu” o‘rtasida “Toshkent—Ribachye” yo‘nalishida yo‘lovchi poyezdi qatnovini yo‘lga qo‘yish bo‘yicha kelishuvga erishilgan. 2018-yilning 22-martidan boshlab poyezd Toshkentdan yozgi mavsum uchun dastlabki qatnovni amalga oshirgan.
Izoh (0)