Ўзбекистон ва Қирғизистон ўртасида ёзги мавсумда «Тошкент— Рибачье (Балиқчи)» йўловчи поезди қатновлари йўлга қўйилади. Бу ҳақда «Киргиз темир жўлу» компанияси матбуот хизмати маълум қилди.
Қатновлар 2019 йилнинг 6 июнидан бошланади ва ҳафтасига бир марта — пайшанба куни амалга оширилади.
Поезд Тошкент вақти билан 20:50 да йўлга чиқиб, Чимкент, Тароз шаҳарлари орқали жума куни соат 19:03 да Бишкекка етиб боради ва 23:19 да Рибачьега келади.
Рибачьедан эса поезд 8 июнь куни соат 04:59 да йўлга чиқиб, 9 июнь, якшанба куни соат 05:00 да Тошкентга қайтиб келади.
Чипталар нархи (Бишкекдан Тошкентга):
- плацкарт вагонда — 1946 қирғиз сўми (2 май ҳолатига кўра — тахминан 235 минг ўзбек сўми)дан;
- купе вагонда — 2461 қирғиз сўми (тахминан 298 минг ўзбек сўми)дан;
- люкс вагонда — 4602 қирғиз сўми (тахминан 556 минг ўзбек сўми)дан бошлаб.
Эслатиб ўтамиз, 2017 йилнинг февраль ойида «Ўзбекистон темир йўллари» ва «Киргиз темир жўлу» ўртасида «Тошкент—Рибачье» йўналишида йўловчи поезди қатновини йўлга қўйиш бўйича келишувга эришилган. 2018 йилнинг 22 мартидан бошлаб поезд Тошкентдан ёзги мавсум учун дастлабки қатновни амалга оширган.
Изоҳ (0)