Jizzax viloyati Paxtakor tuman elektr ta’minoti korxonasi xodimlari o‘z faoliyatlari davomida iste’molchilarni aldab, o‘zganing pul mablag‘ini o‘zlashtirishgani aniqlandi. Bu haqda MIB matbuot xizmati “Daryo”ga xabar berdi.
Bu usul MIBning Paxtakor tuman bo‘limi tomonidan o‘tkazilgan tekshirishda fosh bo‘lgan. Huquqbuzar korxona xodimi X.T quyidagi reja asosda ish olib borgan. U korxonaning “Elektr-hisob” dasturiga kirish uchun berilgan maxsus elektron kalit ya’ni, dasturdagi barcha funksiyalarni tasdiqlovchi elektron raqamli imzodan foydalanib, jinoiy sheriklari Sh.M va K.T bilan 25 ta holatda 32 million so‘mdan ortiq mablag‘larni talon-taroj qilganliklari aniqlangan.
Huquqbuzarlar o‘zlariga o‘lja sifatida tumandagi xususiy korxona rahbaridan naqd pul olib, buning evaziga bir nechta iste’molchilarning 6 million 276 ming so‘m pul mablag‘larini “Elektr-hisob” dasturi yordamida xususiy korxona hisob raqamiga noqonuniy ravishda o‘tkazib bergan va bunday qing‘irliklarini keyinchalik ham boshqa iste’molchilar bilan ham davom ettirgan.
Holat yuzasidan MIB Paxtakor tuman bo‘limi tomonidan huquqbuzarliklarga nisbatan Jinoyat kodeksi 167-moddasi, 3-qismi, “g” bandi bilan jinoyat ishi qo‘zg‘atilib, tuman prokuraturasi tomonidan tergov harakatlari olib borilmoqda.
Izoh (0)