Жиззах вилояти Пахтакор туман электр таъминоти корхонаси ходимлари ўз фаолиятлари давомида истеъмолчиларни алдаб, ўзганинг пул маблағини ўзлаштиришгани аниқланди. Бу ҳақда МИБ матбуот хизмати «Дарё»га хабар берди.
Бу усул МИБнинг Пахтакор туман бўлими томонидан ўтказилган текширишда фош бўлган. Ҳуқуқбузар корхона ходими Х.Т қуйидаги режа асосда иш олиб борган. У корхонанинг «Электр-ҳисоб» дастурига кириш учун берилган махсус электрон калит яъни, дастурдаги барча функцияларни тасдиқловчи электрон рақамли имзодан фойдаланиб, жиноий шериклари Ш.М ва К.Т билан 25 та ҳолатда 32 миллион сўмдан ортиқ маблағларни талон-тарож қилганликлари аниқланган.
Ҳуқуқбузарлар ўзларига ўлжа сифатида тумандаги хусусий корхона раҳбаридан нақд пул олиб, бунинг эвазига бир нечта истеъмолчиларнинг 6 миллион 276 минг сўм пул маблағларини «Электр-ҳисоб» дастури ёрдамида хусусий корхона ҳисоб рақамига ноқонуний равишда ўтказиб берган ва бундай қинғирликларини кейинчалик ҳам бошқа истеъмолчилар билан ҳам давом эттирган.
Ҳолат юзасидан МИБ Пахтакор туман бўлими томонидан ҳуқуқбузарликларга нисбатан Жиноят кодекси 167-моддаси, 3-қисми, «г» банди билан жиноят иши қўзғатилиб, туман прокуратураси томонидан тергов ҳаракатлари олиб борилмоқда.
Изоҳ (0)