Innovatsion rivojlanish vaziri Ibrohim Abdurahmonov boshchiligidagi delegatsiyaning Minsk shahriga xizmat safari Belarus Respublika Kengashi raisi Mixail Myasnikovich bilan uchrashuvdan boshlandi. Bu haqda “Daryo”ga vazirlik matbuot xizmati xabar bermoqda.
Uchrashuvda ikki davlat o‘rtasidagi mazkur sohadagi mavjud aloqalarni mustahkamlash, O‘zbekiston va Belorus texnoparklari o‘rtasida hamkorlikni o‘rnatish masalalari muhokama qilindi. Xususan, ilm-fan sohasida 15 ta qo‘shma loyihani amalga oshirish, o‘zbekistonlik 10 nafar doktorantning o‘qishini tashkil qilish masalalari bo‘yicha muzokaralar o‘tkazildi.
Innovatsion rivojlanish vazirligi huzuridagi “Yashnobod” texnoparki bilan Belarus Fanlar akademiyasi markazlari hamda boshqa texnologik parklar o‘rtasida hamkorlik o‘rnatish bo‘yicha muzokaralar olib borildi. Belarus bilan hamkorlikda ilmiy laboratoriyalar ochish taklifi berildi.
May oyida o‘tkaziladigan Belarus–O‘zbekiston hududlarining ilk forumi ham shunga qaratiladi. Mixail Myasnikovich Belarus parlamentining yuqori palatasi mazkur tadbirga faol tayyorgarlik ko‘rayotgani, buning uchun tashkiliy qo‘mita ham tuzilgani haqida gapirdi.
Minsk shahrida fan va texnologiyalar sohasida hamkorlik bo‘yicha birinchi qo‘shma majlis bo‘lib o‘tdi. Unga Innovatsion rivojlanish vaziri Ibrohim Abdurahmonov hamda Belarus Fan va texnologiyalar davlat qo‘mitasi raisi Aleksandr Shumilin raislik qildi. Yig‘ilishda qo‘shma komissiya a’zolari hamda taklif etilgan ilmiy tashkilotlar rahbarlari ishtirok etdi.
Majlisda energetika va qayta tiklanuvchi energiya, agrosanoat, tibbiyot va tibbiy texnologiyalar, nano va biotexnologiyalar, kimyo texnologiyasi, axborot-kommunikatsion va raqamli texnologiyalar, aerokosmik soha, robototexnika, oziq-ovqat xavfsizligi, ekologiya, lazer texnologiyalari, foydali qazilmalarni topish O‘zbekiston—Belarus ilmiy-texnik hamkorligining ustuvor yo‘nalishlari bo‘lishi belgilandi.
Mamlakatlar o‘rtasida uch yillik ilmiy-texnik hamkorlik dasturi tasdiqlanishi, olimlar va mutaxassislar almashinishi, ilmiy-texnik va innovatsion sohalarda konferensiyalar, seminarlar, ko‘rgazmalar va boshqa tadbirlar o‘tkazilishi haqida kelishib olindi.
Yig‘ilishdan so‘ng O‘zbekiston delegatsiyasi Belarus Milliy texnik universiteti qoshida tashkil etilgan texnopark faoliyati bilan tanishdi.
Izoh (0)