Jizzaxda 14 nafar fuqaroni 328 mln so‘mga chuv tushirgan er-xotin firibgarlarga hukm o‘qildi

Jinoyat ishlari bo‘yicha Mirzacho‘l tuman sudi raisi Maqsud Rayimov “Daryo”ga er-xotin firibgarlarga nisbatan chiqarilgan sud hukmini taqdim etdi.

Salim Savronov va uning turmush o‘rtog‘i Mahfuza Savronova (barcha ism-shariflar o‘zgartirilgan) o‘zganing mulkini firibgarlik yo‘li bilan qo‘lga kiritish maqsadida jinoiy til biriktirib, Jizzax shahrida yashovchi fuqaro F.Davurovning oldiga borib, unga “sotiladigan tilla taqinchoqlaringiz borligini eshitib oldingizga kelyapmiz, ushbu tilla taqinchoqlaringizni bizga bersangiz qimmat narxda 5—6 kunda sotib pulingizni beramiz”, — deb uni ishontirib, 120 gramm turli xildagi bahosi 24 000 000 so‘mlik tilla taqinchoqlarini firibgarlik yo‘li bilan qo‘lga kiritib, bergan va’dasini bajarmasdan, qo‘lga kiritilgan moddiy qimmatliklarni shaxsiy manfaatlariga ishlatib yuborgan.

Er-xotin firibgarlar jinoiy faoliyatini davom ettirib, fuqaro S.Valiyevaning jami 25 350 000 so‘mlik tilla zanjirlarini, I.Ravshanovaning O‘zbekiston Respublikasi milliy valyutasiga nisbatan kiymati 5 032 440 so‘m bo‘lgan 630 AQSh dollar pullarini, N.Farmonovaning jami bo‘lib, 62 150 000 so‘mlik pullarini, I.Gulmamatovaning jami bo‘lib 56 661 000 so‘mlik pullarini, N.Haydarovaning 27 977 000 so‘m bo‘lgan 120 000 gram tilla taqinchoklarni, M.Islomovaning 4 820 000 so‘mlik pullarini, Q.Xolmatovaning jami bo‘lib, 15 000 000 so‘mlik pullarini, M.Murodovaning 10 000 000 so‘m, O.Boqiyevaning 12 000 000 so‘m, S.Abdullayevaning 4 000 000 so‘mlik, G.Tojiyevaning 12 200 000 so‘mlik, A.Abdurashidovning 80 000 000 so‘m pullarni, A.Abduvaliyevning 16 000 000 so‘m pullarni firibgarlik yo‘li bilan qo‘lga kiritib, bergan va’dasini bajarmasdan, pullarni shaxsiy manfaatlariga ishlatib yuborgan.

Sud Mahfuza Savronovaga O‘zbekiston Respublikasi JK 168-moddasi (firibgarlik) 3-qismining “a,b” bandlari bilan 5 (besh) yil 3 (uch) oy ozodlikdan mahrum qilish jazosi tayinlab, unga nisbatan mazkur hukm bilan tayinlangan ozodlikdan mahrum qilish jazosining ijrosi O‘zbekiston Respublikasi JPKning 533-moddasi 1-qismi 3-bandi talabiga ko‘ra, uning 2019-yil 1-fevralda tug‘ilgan farzandi uch yoshga to‘lgunga qadar ya’ni 2022-yil 1-fevralgacha kechiktirdi.

Shuningdek, sud Salim Savronovga O‘zbekiston Respublikasi JK 168-moddasi (firibgarlik) 3-qismining “a,b” bandlari bilan 7 (yetti) yil muddatga ozodlikdan mahrum qilish jazosi tayinlab, jabrlanuvchilarga yetkazilgan moddiy zararlarni undirish belgilandi.