Минскда фан ва технологиялар соҳасида ҳамкорлик бўйича илк Беларусь—Ўзбекистон қўшма мажлиси бўлиб ўтди

Инновацион ривожланиш вазири Иброҳим Абдураҳмонов бошчилигидаги делегациянинг Минск шаҳрига хизмат сафари Беларусь Республика Кенгаши раиси Михаил Мясникович билан учрашувдан бошланди. Бу  ҳақда «Дарё»га вазирлик матбуот хизмати хабар бермоқда.

Учрашувда икки давлат ўртасидаги мазкур соҳадаги мавжуд алоқаларни мустаҳкамлаш, Ўзбекистон ва Белорус технопарклари ўртасида ҳамкорликни ўрнатиш масалалари муҳокама қилинди. Хусусан, илм-фан соҳасида 15 та қўшма лойиҳани амалга ошириш, ўзбекистонлик 10 нафар докторантнинг ўқишини ташкил қилиш масалалари бўйича музокаралар ўтказилди.

Инновацион ривожланиш вазирлиги ҳузуридаги «Яшнобод» технопарки билан Беларусь Фанлар академияси марказлари ҳамда бошқа технологик парклар ўртасида ҳамкорлик ўрнатиш бўйича музокаралар олиб борилди. Беларусь билан ҳамкорликда илмий лабораториялар очиш таклифи берилди.

Май ойида ўтказиладиган Беларусь–Ўзбекистон ҳудудларининг илк форуми ҳам шунга қаратилади. Михаил Мясникович Беларусь парламентининг юқори палатаси мазкур тадбирга фаол тайёргарлик кўраётгани, бунинг учун ташкилий қўмита ҳам тузилгани ҳақида гапирди.

Минск шаҳрида фан ва технологиялар соҳасида ҳамкорлик бўйича биринчи қўшма мажлис бўлиб ўтди. Унга Инновацион ривожланиш вазири Иброҳим Абдураҳмонов ҳамда Беларусь Фан ва технологиялар давлат қўмитаси раиси Александр Шумилин раислик қилди. Йиғилишда қўшма комиссия аъзолари ҳамда таклиф этилган илмий ташкилотлар раҳбарлари иштирок этди.

Мажлисда энергетика ва қайта тикланувчи энергия, aгросаноат, тиббиёт ва тиббий технологиялар, нано ва биотехнологиялар, кимё технологияси, ахборот-коммуникацион ва рақамли технологиялар, аэрокосмик соҳа, робототехника, озиқ-овқат хавфсизлиги, экология, лазер технологиялари, фойдали қазилмаларни топиш Ўзбекистон—Беларусь илмий-техник ҳамкорлигининг устувор йўналишлари бўлиши белгиланди.

Мамлакатлар ўртасида уч йиллик илмий-техник ҳамкорлик дастури тасдиқланиши, олимлар ва мутахассислар алмашиниши, илмий-техник ва инновацион соҳаларда конференциялар, семинарлар, кўргазмалар ва бошқа тадбирлар ўтказилиши ҳақида келишиб олинди.

Йиғилишдан сўнг Ўзбекистон делегацияси Беларусь Миллий техник университети қошида ташкил этилган технопарк фаолияти билан танишди.