Samarqand viloyati hokimi Erkinjon Turdimov o‘zi o‘qigan Qo‘shrabot tumanidagi 64, 41 va 19-umumiy o‘rta ta’lim maktablarining har biriga 200 dan ortiq kitob sovg‘a qildi. Bu haqda “Daryo”ga viloyat hokimligi matbuot xizmati ma’lum qildi.
Hokimlik matbuot xizmatining ma’lum qilishicha, uchrashuvda viloyat hokimi o‘quvchilarga bugungi adabiy jarayon va mutolaa madaniyati xususida to‘xtalib, kitob ma’naviyatni yuksaltiruvchi bebaho xazina ekanini alohida ta’kidlab o‘tgan.
— So‘nggi yillarda aksariyat yoshlar kitob o‘qishga qiziqmay qo‘yishgani rost gap. Ular ko‘proq internetdan ma’lumotlar izlashga, yangiliklarni ham onlayn tarzda topib o‘qishga, telefon orqali turli o‘yinlar, suratlar, videolar ko‘rishga moyildirlar. Buning salbiy ta’siri yoshlar tarbiyasi, odob-axloqi, ma’naviyatida zararli iz qoldirishi mumkin, — deydi viloyat hokimi Erkinjon Turdimov. — Mamlakatimiz Prezidenti Shavkat Mirziyoyevning yoshlarimizni kitobga qaytarish borasidagi sa’y-harakatlarini barcha yurtdoshlarimiz qatori, men ham qo‘llab-quvvatlayman. Chunki kitob bitmas-tugunmas xazina, bilim manbai.
Erkinjon Turdimov ota-onalar bolasiga o‘qib beradigan kitoblar uchun alohida vaqt ajratishi borasida ham to‘xtalib o‘tdi.
— Iloji boricha bolaga doimo bir vaqtda kitob o‘qib berish lozim, shundagina ular shu paytni intiqlik bilan kutishadi, — deydi Erkinjon Turdimov. — Biz yoshi kattalar kitob bolalarning fikrlash doirasini kengaytirish bilan birga tarbiya qilishning eng yaxshi usuli hisoblanishini unutmasligimiz lozim. Ma’naviyatni boyitishdagi kitobning o‘rni beqiyosdir. Shu bois barcha yoshi kattalarga murojaat qilib, yoshlarimizni kitob o‘qishga qaytarish borasida o‘z munosib hissalarini qo‘shishga da’vat qilaman.
Viloyat hokimi kitobsevarlar safini kengaytirish maqsadida uchta yo‘nalishda kitob tanlovini e’lon qildi. Tanlov yakunlariga ko‘ra viloyatdagi eng yaxshi kitobxon oila g‘olibiga Spark avtomobili, eng yaxshi kitobxon maktab (16 ta birinchi o‘rin) – har bir birinchi o‘rinni egallagan maktabga 100 million so‘mdan pul mukofoti, eng yaxshi kitobxon mahalla (16 ta birinchi o‘rin) – har bir birinchi o‘rinni egallagan mahalla fuqarolar yig‘iniga 100 million so‘mdan pul mukofoti beriladi.
Izoh (0)