Самарқанд вилояти ҳокими ўзи ўқиган учта мактабга китоблар совға қилди ва энг яхши китобхон оилага Spark ваъда қилди

Самарқанд вилояти ҳокими Эркинжон Турдимов ўзи ўқиган Қўшработ туманидаги 64, 41 ва 19-умумий ўрта таълим мактабларининг ҳар бирига 200 дан ортиқ китоб совға қилди. Бу ҳақда «Дарё»га вилоят ҳокимлиги матбуот хизмати маълум қилди.

Ҳокимлик матбуот хизматининг маълум қилишича, учрашувда вилоят ҳокими ўқувчиларга бугунги адабий жараён ва мутолаа маданияти хусусида тўхталиб, китоб маънавиятни юксалтирувчи бебаҳо хазина эканини алоҳида таъкидлаб ўтган.

— Сўнгги йилларда аксарият ёшлар китоб ўқишга қизиқмай қўйишгани рост гап. Улар кўпроқ интернетдан маълумотлар излашга, янгиликларни ҳам онлайн тарзда топиб ўқишга, телефон орқали турли ўйинлар, суратлар, видеолар кўришга мойилдирлар. Бунинг салбий таъсири ёшлар тарбияси, одоб-ахлоқи, маънавиятида зарарли из қолдириши мумкин, — дейди вилоят ҳокими Эркинжон Турдимов. — Мамлакатимиз Президенти Шавкат Мирзиёевнинг ёшларимизни китобга қайтариш борасидаги саъй-ҳаракатларини барча юртдошларимиз қатори, мен ҳам қўллаб-қувватлайман. Чунки китоб битмас-тугунмас хазина, билим манбаи.

Эркинжон Турдимов ота-оналар боласига ўқиб берадиган китоблар учун алоҳида вақт ажратиши борасида ҳам тўхталиб ўтди.

— Иложи борича болага доимо бир вақтда китоб ўқиб бериш лозим, шундагина улар шу пайтни интиқлик билан кутишади, — дейди Эркинжон Турдимов. — Биз ёши катталар китоб болаларнинг фикрлаш доирасини кенгайтириш билан бирга тарбия қилишнинг энг яхши усули ҳисобланишини унутмаслигимиз лозим. Маънавиятни бойитишдаги китобнинг ўрни беқиёсдир. Шу боис барча ёши катталарга мурожаат қилиб, ёшларимизни китоб ўқишга қайтариш борасида ўз муносиб ҳиссаларини қўшишга даъват қиламан.

Вилоят ҳокими китобсеварлар сафини кенгайтириш мақсадида учта йўналишда китоб танловини эълон қилди. Танлов якунларига кўра вилоятдаги энг яхши китобхон оила ғолибига Spark автомобили, энг яхши китобхон мактаб (16 та биринчи ўрин) – ҳар бир биринчи ўринни эгаллаган мактабга 100 миллион сўмдан пул мукофоти, энг яхши китобхон маҳалла (16 та биринчи ўрин) – ҳар бир биринчи ўринни эгаллаган маҳалла фуқаролар йиғинига 100 миллион сўмдан пул мукофоти берилади.