O‘zbekistonda Zulfiya nomidagi davlat mukofoti ta’sis etilganiga 20 yil to‘ldi. Bu vaqt ichida 283 nafar iste’dodli qiz mazkur mukofotga loyiq deb topildi, deya xabar beradi O‘zA.
Prezidentning 1999-yil 10-iyundagi farmoniga muvofiq Zulfiya nomidagi davlat mukofoti 14 yoshdan 22 yoshgacha bo‘lgan Qoraqalpog‘iston Respublikasi, viloyatlar va Toshkent shahrining bittadan vakilalariga berilgan edi.
2018-yilda mukofotni o‘n to‘rt yoshga to‘lgan va o‘ttiz yoshdan oshmagan Qoraqalpog‘iston Respublikasi, viloyatlar va Toshkent shahridan ikki nafar talantli qizlarga berish belgilandi.
Yangi tartibga muvofiq, umumiy o‘rta, o‘rta maxsus, kasb-hunar ta’lim muassasalarining Zulfiya nomidagi davlat mukofoti laureatlari bo‘lgan o‘quvchilari bakalavriatga, bakalavriat talabalari esa oliy ta’lim muassasalari magistraturasiga tegishli yo‘nalish va ixtisoslik bo‘yicha kirish sinovlarisiz davlat grantlari asosida qabul qilinadi.
Mukofot laureatlarining oliy ta’lim muassasalariga kirishi bo‘yicha imtiyoz kengaytirildi. Endi ular kirish imtihonlarisiz oliy ta’lim muassasalarining nafaqat bakalavriat, balki magistratura bosqichiga ham davlat granti asosida kirishi mumkin.
Izoh (0)