6-martning e’tiborga molik yangiliklari — “Daryo” dayjestida.
Shavkat Mirziyoyev O‘zbekistonda hukumatni shakllantirish tartibiga doir qonunni imzoladi.
Joriy yilning 1-aprel sanasidan kuchga kiradigan mazkur qonunga binoan, Vazirlar Mahkamasi a’zolari nomzodi Oliy Majlis Qonunchilik palatasi majlisida ko‘rib chiqilib, ma’qullanganidan keyingina Prezident tomonidan lavozimga tasdiqlanish tartibi joriy etilmoqda.
***
Bosh prokuratura: Gulnora Karimova endi jazoni umumiy tartibli koloniyada o‘taydi.
G.Karimova jazoni o‘tash tartibi va shartlarini qasddan buzganligi sababli jinoyat-ijroiya qonunchiligiga muvofiq, O‘zbekiston Respublikasi IIV Jazoni ijro etish bosh boshqarmasi huzuridagi Probatsiya xizmatining taqdimnomasiga asosan, 2019 -yil 5-martda jinoyat ishlari bo‘yicha Yashnobod tumani sudi tomonidan unga nisbatan tayinlangan jazoning o‘talmay qolgan muddati ozodlikdan mahrum qilish jazosi bilan almashtirilib, umumiy tartibli koloniyada o‘tashi belgilangan.
Eslatib o‘tamiz, oldinroq Imon Karimova onasining o‘z xonadonidan o‘g‘irlab ketilganini ma’lum qilgandi.
O‘zA esa jurnalist Ismat Xushevning (Kanada, Toronto shahri) ushbu voqealar yuzasidan shaxsiy kuzatuv va xulosalarini e’lon qildi.
***
Qoraqalpog‘istonda yoshi 50-60 mln yilga teng “dinozavr tuxumlari” bor.
Fanda “Moyeraki toshlari“ deb nom berilgan sharsimon toshlar geologik nuqtai nazardan olib qaraganda, kalsiy bilan okeanning minerallashgan tuzlarining hamda sozli tuproqning birikishidan hosil bo‘ladi.
Nukusdan 30 kilometr olisda joylashgan Amudaryo tumanidagi ushbu toshlar Tetis ummoni esdaliklaridir.
***
Rossiya sog‘liqni saqlash vaziri Moskva — Toshkent reysi davomida tobi qochgan o‘zbekistonlik ayolga tibbiy yordam ko‘rsatdi.
Vazir vaziyatni hayot uchun xavfli emas deb topdi va o‘zi doim olib yuradigan aptechkadan dori-darmonlar olib keldi. Ularni qabul qilgandan so‘ng yo‘lovchi ayolning holati yaxshilandi.
***
Surxondaryoda Milliy gvardiya, ichki ishlar va chegara qo‘shinlariga ishga joylashni va’da qilgan “DXX xodimlari” ushlandi.
Mazkur shaxslar o‘zlarini go‘yoki Davlat xavfsizlik xizmati idoralarida ishlayman deya tanishtirib, sodda odamlarning ishonchiga kirib, ularning farzandlarini oliy o‘quv yurtiga o‘qishga kiritish, muddatli harbiy xizmatga yuborish va huquq-tartibot idoralariga ishga joylashtirishni va’da qilib, ulardan pul talab qilib kelgan.
Izoh (0)