Oliy Majlis Qonunchilik palatasida o‘tkazilgan navbatdagi “Hukumat soati”ga quyi palatadagi O‘zbekiston Xalq demokratik partiyasi fraksiyasining tashabbusi bilan “Aholini suyultirilgan gaz bilan ta’minlash borasida amalga oshirilayotgan ishlar, mavjud muammolar va ularni bartaraf etish bo‘yicha ko‘rilayotgan choralar to‘g‘risida” gi masala kiritildi. Bu haqda palata matbuot xizmati ma’lum qildi.
Mazkur masala yuzasidan axborot berish hamda deputatlar savollariga javob qaytarish uchun quyi palataga Iqtisodiyot va sanoat vaziri Botir Xo‘jayev taklif etildi.
Ayni paytda respublika bo‘yicha jami 3,3 millionta suyultirilgan gaz abonenti bo‘lib, gaz ta’minoti korxonalari tomonidan jami 3,4 million dona maishiy gaz ballonlari yetkazib berilgan. Bundan tashqari, aholining shaxsiy 1,1 million dona gaz balloni bor. Ya’ni, abonentlar soniga nisbatan ta’minlanganlik darajasi 137 foizni tashkil etadi. Qolaversa, shu yilning 1-yanvar holatiga ko‘ra, respublika bo‘yicha 2,1 millionta ijtimoiy soha obyektlariga suyultirilgan gaz yetkazib berilmoqda.
2019-yilda suyultirilgan gaz manbalari va taqsimoti balansiga ko‘ra, joriy yilda 806,1 ming tonna suyultirilgan gaz ishlab chiqarilib, shundan 474,7 tonnasi yoki o‘tgan yilga nisbatan 60,7 ming tonna ko‘prog‘i aholining maishiy ehtiyojlari uchun yetkazib berilishi belgilangan. Suyultirilgan gaz asosan aholining o‘sib borayotgan maishiy ehtiyojlarini qoplash uchun yo‘naltirilishi belgilanganini inobatga olib, suyultirilgan gazni birjada sotish miqdori yildan yilga kamaytirilib borilmoqda.
Deputatlar vazirga bu boradagi masalalar, aholini qiynab kelayotgan aniq muammolar xususida savollar bilan murojaat etdilar. Ayniqsa, parlament vakillarining e’tiroziga sabab bo‘lgan masala — tabiiy gaz yetib bormaydigan hududlarni o‘z vaqtida suyultirilgan gaz bilan ta’minlash, gaz ballonlari standartlari va ularning to‘lovi bilan bog‘liq masalalar yuzasidan izoh so‘raldi.
Oliy Majlis quyi palatasi vakillarining saylovchilar bilan o‘tkazayotgan ochiq muloqotlari davomida kelib tushayotgan ko‘plab murojaatlar tahlili aholini suyultirilgan gaz bilan ta’minlash borasida muammolar yuzaga kelayotganini ko‘rsatmoqda. Xususan, joriy yil yanvar va fevral oyining oxirgi haftasida saylov okruglarida o‘tkazilgan uchrashuvlar davomida deputatlar tomonidan ushbu masala o‘rganilganda, aholining haqli e’tirozlariga sabab bo‘layotgan bir qancha kamchiliklar aniqlandi.
Masalan, aholi ko‘tarayotgan muammolarga ko‘ra, 20 kilogrammli maishiy gaz ballonlariga ko‘p hollarda me’yordagidan kam quyilayotgani iste’molchilarning jiddiy e’tirozlariga sabab bo‘lmoqda. Yoki gaz olish uchun kelgan aholi vakillarining bank plastik kartasi orqali to‘lovni amalga oshira olmasligi noqulaylik keltirib chiqarayotganiga doir faktlar ham bor.
Vazir deputatlar savollariga javob qaytarar ekan, bunday salbiy holatlar uchrab turganini, bu masalada vazirlik tomonidan jiddiy nazorat olib borilayotgani, kamchiliklarga yo‘l qo‘ygan mutasaddilarga nisbatan choralar ko‘rilayotganini qayd etdi. O‘z navbatida, bu borada qilinishi kerak bo‘lgan ishlar, nazorat qiluvchi va boshqa mutasaddilar mas’uliyatini yanada oshirish yuzasidan o‘z mulohazalarini bildirib o‘tdi.
“Hukumat soati” doirasida berilgan savol-javoblardan kelib chiqib, deputatlar tomonidan vazirlik faoliyatida yo‘l qo‘yilayotgan kamchiliklarni bartaraf etish yuzasidan qator takliflar bildirildi.
Izoh (0)